Nnwom 116 - Asante Twi Nkwa Asɛm

Dwom 116

¹ Medɔ Awurade ɛfiri sɛ, ɔtee me nne. Ɔtee me mmɔborɔhunu su.

² Esiane sɛ ɔbrɛɛ nʼaso maa me enti, mɛfrɛ no wɔ ɛberɛ a mete ase yi.

³ Owuo nhoma kyekyeree me, ɛda ho ahometeɛ baa me so, ɔhaw ne awerɛhoɔ hyɛɛ me so.

⁴ Afei mebɔɔ Awurade din kaa sɛ, “Ao Awurade, gye me nkwa!”

⁵ Awurade yɛ ɔdomfoɔ ne ɔteneneeni; ayamhyehyeɛ ahyɛ yɛn Onyankopɔn ma.

⁶ Awurade bɔ ɔwɛmfoɔ ho ban; ɛberɛ a mewɔ ahohiahia mu no, ɔgyee me.

⁷ Nya abotɔyam bio, Ao me kra, ɛfiri sɛ Awurade ne wo adi no yie.

⁸ Na wo, Ao Awurade, woagye me kra afiri owuo mu; woamma mʼani amporo nisuo, na woamma me nan ansunti,

⁹ sɛ mɛnante Awurade anim wɔ ateasefoɔ asase so.

¹⁰ Megye diiɛ; ɛno enti mekaa sɛ, “Mewɔ ahohia kɛseɛ mu.”

¹¹ Na mʼabasamtuo mu, mekaa sɛ, “Nnipa nyinaa yɛ atorofoɔ.”

¹² Ɛdeɛn na mɛtumi de atua Awurade ka wɔ ne papa a wayɛ ama me nyinaa?

¹³ Mɛma nkwagyeɛ kuruwa no so na mabɔ Awurade din.

¹⁴ Mɛdi ɛbɔ a mahyɛ Awurade no nyinaa so wɔ ne nkurɔfoɔ nyinaa anim.

¹⁵ Nʼahotefoɔ wuo yɛ aboɔden wɔ Awurade ani so.

¹⁶ Ao Awurade, ampa ara meyɛ wo ɔsomfoɔ; meyɛ wo ɔsomfoɔ, wʼafenaa babarima; wayi me afiri me mpɔkyerɛ mu.

¹⁷ Mɛbɔ aseda afɔdeɛ ama wo na mabɔ Awurade din.

¹⁸ Mɛdi me bɔ a mahyɛ Awurade no so wɔ ne nkurɔfoɔ nyinaa anim,

¹⁹ wɔ adihɔ a ɛwɔ Awurade fie wɔ wo mfimfini, Ao Yerusalem. Monkamfo Awurade.