Nnwom 114 - Asante Twi Nkwa Asɛm

Dwom 114

¹ Ɛberɛ a Israelfoɔ firii Misraim, na Yakob fiefoɔ firii ananafoɔ asase so no,

² Yuda bɛyɛɛ Awurade kronkronbea na Israel bɛyɛɛ nʼahemman.

³ Ɛpo no huruiɛ na ɛdwaneeɛ, Yordan sanee nʼakyi;

⁴ Mmepɔ hurihurii sɛ nnwennini nkokoɔ nso hurihurii sɛ nnwammaa.

⁵ Ɛdeɛn na ɛbaeɛ, Ao ɛpo, na wodwaneeɛ, Ao Yordan, na wosanee wʼakyi,

⁶ mo mmepɔ, na mohurihuri sɛ nnwennini, na mo nkokoɔ, mohurihuri sɛ nnwammaa?

⁷ Asase, ma wo ho mpopo wɔ Awurade anim, wɔ Yakob Onyankopɔn anim,

⁸ ɔno na ɔmaa ɔbotan no danee asubura, na abotan a ɛyɛ den danee nsuwa nsuwa no.