Mmebusɛm 7 - Asante Twi Nkwa Asɛm

Ɔbaawaresɛefoɔ Ho Kɔkɔbɔ

¹ Me ba, fa me nsɛm sie na kora mʼahyɛdeɛ wɔ wo mu.

² Di mʼahyɛdeɛ so na wobɛnya nkwa; bɔ me nkyerɛkyerɛ ho ban sɛ deɛ wodɔ noɔ.

³ Kyekyere bɔ wo nsateaa ho; twerɛ no yie gu wʼakoma ɛpono so.

⁴ Ka kyerɛ nyansa sɛ, “Wo yɛ me nuabaa,” na frɛ nteaseɛ wo busuani;

⁵ Wɔbɛtwe wo afiri ɔbaawaresɛefoɔ ho, afiri ɔbaawarefoɔ sansani nsɛmmɔdɛ ho.

⁶ Me fie mpomma ano mede mʼani faa ntokua mu.

⁷ Mehunuu wɔ ntetekwaafoɔ mu, mehyɛɛ mmeranteɛ no mu baako nso, ɔbabunu a ɔnni adwene.

⁸ Na ɔnam borɔno a ɛbɛn ɔbaa no fie so a nʼani kyerɛ ɔbaa no fie

⁹ ɛberɛ a ɔnwunu redwoɔ, na animu rebiribiri no.

¹⁰ Afei ɔbaa bi firi bɛhyiaa no a wasiesie ne ho sɛ odwamanfoɔ a nnaadaa wɔ nʼakomam.

¹¹ (Ɔyɛ hyirenn na hwee mfa ne ho, ɔntena efie koraa;

¹² ɛnnɛ wɔhunu no mmɔntene so, ɔkyena na ɔte adwaberem, ɔtetɛ wɔ mmantwea mmantwea.)

¹³ Ɔsɔɔ ne mu fee nʼano wamfɛre, na ɔkaa sɛ,

¹⁴ “Mewɔ ayɔnkofa ayɛyɛdeɛ wɔ efie; ɛnnɛ madi me bɔhyɛ so.

¹⁵ Enti mebaeɛ sɛ merebɛhyia wo; mehwehwɛɛ wo na mahunu wo!

¹⁶ Mato me mpa mede nwera a wɔahyɛ no aduro a ɛfiri Misraim.

¹⁷ Mede nnuhwam apete me mpa so: kurobo, pɛperɛ ne sinamon.

¹⁸ Bra, ma yɛmfa ɔdɔ mmɔ ɔdɔ mu nkɔsi anɔpa;

¹⁹ Me kunu nni efie; watu kwan na ɔbɛkyɛre.

²⁰ Ɔde sika a ɛdɔɔso hyɛɛ ne sikabɔtɔ ma na ɔremma kɔsi ɔsrane no korokumatwa berɛ mu.”

²¹ Ɔde akorɔkorɔ bɔɔ no asɔn; ɔde nnaadaa nyaa no ne no daeɛ.

²² Ɔdii nʼakyi prɛko pɛ te sɛ nantwie a ɔrekɔ akumiiɛ, anaa ɔwansane a ɔde ne tiri rekɔhyɛ hankrafidie mu

²³ kɔsi sɛ bɛmma bɛhwire ne brɛboɔ mu, te sɛ anomaa a ɔrekɔtɔ anomaa afidie mu na ɔnnim sɛ ɔbɛhwere ne nkwa.

²⁴ Na afei, me mma, montie me; monyɛ aso mma deɛ meka.

²⁵ Mommma mo akoma mpatere nkɔ ne so na mommane mfa nʼakwan so.

²⁶ Bebree na wɔnam ne so ahwehwe ase; wɔn a wakum wɔn dɔɔso pa ara.

²⁷ Ne fie yɛ ɛda kwantempɔn a ɛkɔ owuo mpia mu.