Hiob 23 - Asante Twi Nkwa Asɛm

Hiob Mmuaeɛ

¹ Na Hiob buaa sɛ,

² “Ɛnnɛ mpo, mʼabooboodie mu da so yɛ den; ne nsa ayɛ den mʼapinisie nyinaa akyi.

³ Sɛ menim baabi a mɛhunu no; anaasɛ mɛtumi akɔ ne tenaberɛ a,

⁴ anka mɛka mʼasɛm wɔ nʼanim na magye akyinnyeɛ bebree.

⁵ Anka mɛte mmuaeɛ a ɔde bɛma me, na madwene deɛ ɔbɛka ho.

⁶ Ɔde tumi a ɛso bɛtia me anaa? Dabi, ɔremmɔ me kwaadu.

⁷ Ɛhɔ deɛ nnipa tenenee bɛtumi aka nʼasɛm wɔ nʼanim, na wɔbɛgye me afiri me ɔtemmufoɔ nsam afebɔɔ.

⁸ “Nanso sɛ mekɔ apueeɛ fam a, ɔnni hɔ; sɛ mekɔ atɔeɛ fam nso a, menhunu no.

⁹ Sɛ ɔreyɛ adwuma wɔ atifi fam a, menhunu no; sɛ ɔdane ne ho kɔ anafoɔ fam a, mʼani nhye ne ho.

¹⁰ Nanso, ɔnim ɛkwan a me nam soɔ; na sɛ ɔsɔ me hwɛ a, mɛfiri mu aba sɛ sikakɔkɔɔ.

¹¹ Madi nʼanammɔn akyi pɛɛ; na manante nʼakwan so a mammane.

¹² Mentwee me ho mfirii mmaransɛm a ɛfiri nʼanom ho, mama asɛm a ɛfiri nʼanom ho ahia me asene me daa aduane.

¹³ “Nanso ɔbiara nni hɔ ka ne ho, na hwan na ɔbɛtumi atia no? Ɔyɛ biribiara a ɔpɛ.

¹⁴ Ɔhwɛ ma ne ɔhyɛ nsɛm tia me; ɔda so kora nhyehyɛeɛ a ɛte sei bebree.

¹⁵ Ɛno enti na mebɔ hu wɔ nʼanim; na sɛ medwene yeinom nyinaa ho a, mesuro no.

¹⁶ Onyankopɔn ama mʼakoma aboto; Otumfoɔ ama mabɔ huboa.

¹⁷ Nanso esum no mma menka mʼano ntom, esum kabii a ɛkata mʼanim no mpo.