Salmow 99 - An Sowter 1997 2023

SALM 99. Dominus regnavit.

¹ An Arloedh yw Myghtern; krenes an poblow : ev yw esedhys war an cherubim; krysyes an nor.

² Meur yw an Arloedh yn Sion : hag ughel a-ugh oll an poblow.

³ Gormelens i dha Hanow meur hag euthyk : rag sans yw.

⁴ An Galloesek yw Myghtern hag a gar gwirvreus; ty re fastyas ewnhynseth : ty re wrug gwirvreus hag ewnder yn Yakob.

⁵ Ughelhewgh an Arloedh agan Duw : hag omblegyewgh a-dherag y skavell-droes, rag sans yw ev.

⁶ Moyses hag Aron yn mysk y oferysi, ha Samuel yn mysk an re a elow war y Hanow : i a elwis war an Arloedh hag ev a worthybis dhedha.

⁷ Ev a gewsis orta y'n goloven a gommol : i a synsis y dhustuniow hag an gorhemmynn a ros dhedha.

⁸ Ty a worthybis dhedha, A Arloedh agan Duw : ty yw Duw dhedha, parys dhe ava, hwath ow tiella aga drogoberow.

⁹ Ughelhewgh an Arloedh agan Duw, ha gordhyewgh ev war y venydh sans : rag sans yw an Arloedh agan Duw.