Salmow 96 - An Sowter 1997 2023

SALM 96. Cantate Domino.

¹ Kenewgh dhe'n Arloedh kan nowydh : kenewgh dhe'n Arloedh, oll an norvys.

² Kenewgh dhe'n Arloedh, bennigewgh y Hanow : diskwedhewgh y selwyans a dhydh dhe dhydh.

³ Derivewgh y wolewder yn mysk an kenedhlow : y varthusyon yn mysk oll an poblow.

⁴ Rag meur yw an Arloedh, ha pur wiw yw y wormel : res yw perthi own anodho dres oll duwow.

⁵ Rag oll duwow an kenedhlow yw koegyon : mes an Arloedh a wrug an nevow.

⁶ Yma enor ha meuredh a-dheragdho : yma nerth ha tekter yn y sentri.

⁷ Askrifewgh dhe'n Arloedh, hwi deyluyow a'n poblow : askrifewgh dhe'n Arloedh gordhyans ha nerth.

⁸ Askrifewgh dhe'n Arloedh an gordhyans a dhegoedh dh'y Hanow : drewgh offrynn, ha dewgh yn y glosyow.

⁹ Gordhyewgh an Arloedh yn tekter sansoleth : kren a-dheragdho, oll an norvys.

¹⁰ Leverewgh yn mysk an kenedhlow, ‘Yma an Arloedh ow reynya : an nor devri yw fastys, ma na yllir y dhisevel; ev a vreus an poblow gans ewnder.’

¹¹ Lowenhes an nevow, ha bedhes an norvys heudhik : tarennes an mor, ha myns eus ynno.

¹² Bedhes an gwel fest heudhik ha myns eus ynno : ena y lowenha oll gwydh an koes a-dherag an Arloedh;

¹³ Rag ev a dheu, ev a dheu dhe vreusi an norvys : ev a vreus an norvys gans ewnder, ha'n poblow gans y lelder.