Salmow 94 - An Sowter 1997 2023

SALM 94. Deus ultionum.

¹ A Arloedh, ty Dhuw a dhial : ty Dhuw a dhial, omdhiskwa.

² Sav, ty vreusyas an norvys : tal aga gober dhe'n re woethus.

³ A Arloedh, pygemmys prys y hwra an debeles : pygemmys prys y hwra an debeles tryghi?

⁴ Pygemmys prys y klapp, ha kewsel yn hwoethus : ha bostya oll an dhrogoberoryon?

⁵ I a vrew dha bobel, A Arloedh : ha grevya dhe'th ertach.

⁶ I a ladh an wedhwes ha'n alyon : ha moldra an re omdhivas.

⁷ Mes i a lever, Ny wel an Arloedh : ha ny wra Duw Yakob vri.

⁸ Ombreder, hwi anfur yn mysk an bobel : ha hwi an re dalsogh, p'eur fydhowgh fur?

⁹ Neb a blansas an skovarn, a ny glew : ha neb a formyas an lagas, a ny wel?

¹⁰ Po neb a geredh an kenedhlow, a ny gesk : ev neb a dhysk godhvos dhe vab-den, a ny woer?

¹¹ An Arloedh a woer prederow den : aga bos euveredh.

¹² Gwynnvys an gour a geredhydh, A Arloedh : ha dyski dhodho yn-mes a'th lagha;

¹³ Rag may rylli dhodho powesva dhiworth dydhyow anken : erna vo an pytt kleudhys rag an tebelwas.

¹⁴ Drefenn na as an Arloedh y bobel : ha ny forsak y ertach.

¹⁵ Rag gwirvreus a dhehwel dhe wiryonedh : hag oll an re ewnhynsek aga holonn a hol war hy lergh.

¹⁶ Piw a omdhrehav ragov erbynn an debeles : piw a sev ragov erbynn an dhrogoberoryon?

¹⁷ Na ve an Arloedh ow gweres : nammna drygsa ow enev yn taw.

¹⁸ Pan leveris vy, Ow throes a drebuch : dha dregeredh, A Arloedh, a'm skoedhyas.

¹⁹ Yn prederow pals a-berth ynnov : dha hebaska a lowenha ow enev.

²⁰ Eus kowethyans genes orth se sherewneth : an re a wra dregynn erbynn an lagha?

²¹ I a omguntell war-barth erbynn enev an den gwiryon : ha dampnya an goes glan.

²² Mes an Arloedh yw ow dinas : ha'm Duw yw karrek ow skovva.

²³ Ev a attal dhedha aga sherewneth aga honan, ha'ga distrui yn aga droktra aga honan : devri, an Arloedh agan Duw a wra aga hisya.