Salmow 92 - An Sowter 1997 2023

SALM 92. Bonum est confiteri.

¹ Da yw grassa dhe'n Arloedh : ha kana gormola dhe'th Hanow, an Ughella,

² Ow terivas dha dregeredh myttinweyth : ha'th wiryonedh nosweyth,

³ War dhaffar a dheg kordenn ha war an sowtri : war an delynn hweg hy thon.

⁴ Rag ty, A Arloedh, re'm heudhhas dre dha wriansow : orth ober dha dhiwleuv my a arm yn lowen.

⁵ A Arloedh, ass yw meur dha oberow : pur dhown yw dha brederow.

⁶ Ny woer gour talsogh : ha ny gonvedh den foll hemma.

⁷ Pan las an debeles avel an gwels, ha pan sewen oll an dhrogoberoryon : ena y fydhons diswrys bynnari; mes yth esos y'n ughelder bys vykken, A Arloedh.

⁸ Rag otta, dha eskerens, A Arloedh, otta, dha eskerens a dhe goll : ha diberthys vydh oll an dhrogoberoryon.

⁹ Mes ty re ughelhas ow horn avel korn an ojyon gwyls : ty re'm untyas gans oyl yr.

¹⁰ Ow lagas ynwedh a wel ow mynnas war ow eskerens : ha'm diwskovarn a glew ow mynnas a'n debelwesyon a sev er ow fynn.

¹¹ An den gwiryon a las avel an balmwydhenn : hag ev a dyv avel kederwydhenn yn Lebanon.

¹² An re yw plynsys yn chi an Arloedh : a las yn klosyow agan Duw.

¹³ I a dheg frut hwath yn aga hothni : hag y fydhons yr ha glas.

¹⁴ Rag may teriffons an Arloedh dhe vos ewnhynsek : ow harrek yw ev, ha nyns eus kammhynseth ynno.