Salmow 91 - An Sowter 1997 2023

SALM 91. Qui habitat.

¹ Seul a drig yn skovva an Ughella : a bowes yn-dann woskes an Ollgalloesek.

² My a lever dhe'n Arloedh, Ow skovva, ha'm dinas : ow Duw a drestyav ynno.

³ Rag ev a'th selow dhiworth maglenn an ydhna : ha dhiworth an pla fell.

⁴ Ev a'th kudh gans y bluv, hag yn-dann y eskelli y hwilydh skovva : y wirder yw dha skoes ha'th vokler.

⁵ Ny berthydh own a euthekter y'n nos : nag a'n seth a nij y'n jydh;

⁶ A'n pla a gerdh yn tewlder : nag a'n jevan a dhistru y'n hanter-dydh.

⁷ Mil dhen a goedh ryb dha skoedh, ha deg mil orth dha leuv dhyghow : mes ny dheu hemma ogas dhiso.

⁸ Ny wredh saw mires gans dha dhewlagas : ha gweles pewas an debeles.

⁹ Rag ty re wrug an Arloedh dha skovva : ty re worras an Ughella avel dha drigva.

¹⁰ Ny hwyrvydh dhis drog vytholl : ha ny dheu pla ogas dhe'th tylda.

¹¹ Rag ev a re gorhemmynn dh'y eledh a-dro dhis : ma'th witthons jy yn oll dha fordhow.

¹² I a'th perth yn aga diwleuv : ma na weski dha droes erbynn men.

¹³ Ty a drett yn-dann dreys an lew ha'n nader : ty a stank war an lew yowynk ha'n dhragon.

¹⁴ Drefenn ev dhe worra y gerensa warnav, rakhenna my a'n delirv : my a'n drehav, rag ev dhe aswonn ow Hanow.

¹⁵ Ev a elow warnav ha my a worthyp dhodho : yth esov ganso yn anken; my a'n delirv ha'y enora.

¹⁶ Bewnans hir a rov dhodho : ha diskwedhes dhodho ow selwyans.