Salmow 89 - An Sowter 1997 2023

SALM 89. Misericordias Domini.

¹ My a gan a dregeredhow an Arloedh bynitha : gans ow ganow y terivav dha lelder a unn henedh dhe'n nessa.

² Rag my re leveris, bos tregeredh drehevys bynitha : dha lelder a fastydh y'n nevow.

³ My re wrug kevambos gans an den dewisys genev : my re dos dhe Davydh ow gwas;

⁴ Dha has a fastyav bynitha : ha'th se a dhrehavav a unn henedh dhe'n nessa.

⁵ Ha'n nevow a wormel dha varthusyon, A Arloedh : dha lelder ynwedh yn kuntelles an syns.

⁶ Rag piw y'n nevow : a yll bos kehaval dhe'n Arloedh?

⁷ Piw yn mysk mebyon an duwow : a yll bos haval dhe'n Arloedh?

⁸ Ownys yw Duw yn kuntelles an syns : pur euthyk a-ugh oll an re usi yn y gyrghynn.

⁹ A Arloedh Duw an luyow, piw yw galloesek avelos jy : galloesek osta, A Arloedh; yma dha lelder a-dro dhis.

¹⁰ Ty a rewl hwythfians an mor : pan sev y donnow, ty a's koselha.

¹¹ Ty re vrewis Rahab dhe eneworres : ty re skattras dha eskerens gans nerth dha vregh.

¹² Yma an nevow dhiso jy, yma an nor ynwedh dhiso jy : an norvys ha pup-tra eus ynno, ty re's selyas.

¹³ An kledh ha'n dyghow, ty re's formyas : Tabor ha Hermon a gri yn lowen y'th Hanow.

¹⁴ Yma dhis bregh alloesek : nerthek yw dha leuv, hag ughel yw dha leuv dhyghow.

¹⁵ Ewnder ha gwirvreus yw sel dha se : tregeredh ha gwirder a a-dherag dha fas.

¹⁶ Gwynnvys an bobel a aswonn an arm heudhik : neb a gerdh, A Arloedh, yn golow dha fas.

¹⁷ I a lowenha y'th Hanow oll an jydh : hag y'th ewnder y fydhons ughelhes.

¹⁸ Rag ty yw glori aga nerth : hag y'th vodh da y trehevydh agan korn.

¹⁹ Rag an Arloedh Duw yw agan skoes : ha Sans Ysrael yw agan Myghtern.

²⁰ Yn termyn passys y kewssys orth dha syns yn gwelesigeth, ha leverel : ‘My re worras gweres war onan galloesek; my re dhrehevis onan dewisys yn-mes a'n bobel.

²¹ My re gavas Davydh ow gwas : gans ow oyl sans my re'n untyas.

²² Ow leuv a'n menten : ha'm bregh ynwedh a'n krevha.

²³ Ny drygh an eskar warnodho : ha ny'n pystik mab sherewneth.

²⁴ Ha my a vrew y eskerens a-dheragdho : ha'n re a'n kas my a's gwysk.

²⁵ Mes ow lelder ha'm tregeredh a vydh ganso : hag y'm Hanow vy y fydh y gorn ughelhes.

²⁶ Ha my a sett y leuv y'n mor : ha'y leuv dhyghow y'n avonyow.

²⁷ Ev a elow warnav, Ow thas osta jy : ow Duw, ha karrek ow selwyans.

²⁸ Ha my a'n gwra ow hynsa-genys : an ughella a vyghternedh an nor.

²⁹ My a with ow thregeredh orto bynitha : ha'm kevambos ganso a sev fast.

³⁰ My a wra dh'y has durya bys vykken : ha'y se avel dydhyow nev.

³¹ Mar kwra y fleghes gasa ow lagha : ha mar ny gerdhons y'm breusow,

³² Mar terrons ow ordenansow : ha ny synsons ow gorhemmynnow,

³³ Ena my a gessydh aga threuspass gans an welenn : ha'ga hammweyth gans strokosow.

³⁴ Mes ny gemmerav ow thregeredh dhiworto : ha ny vydhav fals dhe'm lelder.

³⁵ Ny dorrav ow hevambos : ha ny dreylyav an ger a dheuth yn-mes a'm diwweus.

³⁶ Unnweyth re des vy re'm sansoleth : ny wowlavarav orth Davydh.

³⁷ Y has a dhur bys vykken : ha'y se a vydh avel an howl a-dheragov.

³⁸ Ev a vydh fastys avel an loer bynitha : hag avel dustuni len y'n nevow.’

³⁹ Mes ty re dewlis dhe-ves ha skonya : ty re sorras orth dha Untys.

⁴⁰ Ty re skonyas an kevambos gans dha was : ty re dhefolas y gurun, orth hy thewlel dhe'n dor.

⁴¹ Ty re dorras oll y geow ev : ty re wrug y dhinasow magoryow.

⁴² Oll an dremenysi a'n pyll : ev a dheuth ha bos skorn dh'y gentrevogyon.

⁴³ Ty re dhrehevis leuv dhyghow y envi : ty re lowenhas oll y eskerens.

⁴⁴ Ty re dreylyas min y gledha : ha ny'n gessys dhe sevel y'n gas.

⁴⁵ Ty re dorras an welenn yn-mes a'y leuv : ha tewlel y se dhe'n dor.

⁴⁶ Ty re verrhas dydhyow y yowynkneth : ty re'n kudhas gans meth.

⁴⁷ Pygemmys prys, A Arloedh? A omgudhydh jy bynitha : a lesk dha sorr avel tan?

⁴⁸ Porth kov, A Arloedh, ass yw kott ow bewnans : a formsys oll mebyon den yn euver?

⁴⁹ Py gour a vew heb gweles ankow? : A yll ev delivra y enev dhiworth leuv ifarn?

⁵⁰ Ple'ma dha dregeredhow koth, A Arloedh : an re a desys dhe Davydh y'th lelder?

⁵¹ Porth kov, A Arloedh, a vewl dha wesyon : fatell borthav y'm askra despit an poblow;

⁵² An despit ganso may skornyas dha eskerens, A Arloedh : may skornsons olow dha Untys.

⁵³ Benniges re bo an Arloedh bys vykken ha bynnari : Amen hag Amen.