Salmow 88 - An Sowter 1997 2023

SALM 88. Domine Deus.

¹ A Arloedh Duw ow selwyans, my re armas dydh ha nos a-dheragos : des ow fysadow a-dheragos, pleg dha skovarn dhe'm kri.

² Rag leun yw ow enev a boenvos : ha'm enev a dheu nes dhe ifarn.

³ Reknys ov vy yn mysk an re a dhiyskynn dhe'n pytt : yth ov vy kepar ha gour heb nerth,

⁴ Gesys yn mysk an re varow, kepar ha'n re ledhys neb a wrowedh y'n bedh : na berthydh kov anedha namoy, ha diberthys yns i dhiworth dha leuv.

⁵ Ty re'm gorras y'n pytt isella : yn tylleryow tewl, hag yn downderyow.

⁶ Dha gonnar yw poes warnav : ha ty re dhros warnav oll dha donnow.

⁷ Ty re bellhas dhiworthiv oll an re aswonnys genev : ty re'm gwrug kasadow dhedha.

⁸ Prisonys yn fast ov vy : ma na allav diank.

⁹ Ow lagas a fyll dre dhuwon : A Arloedh, my a elwis warnas pub dydh, my re ystynnas ow diwleuv dhis.

¹⁰ A dhiskwedhydh marthusyon dhe'n re varow : a dhassergh spyrysyon an re varow dhe'th wormel?

¹¹ A vydh dha dregeredh disklerys y'n bedh : po dha lelder yn Abaddon?

¹² A vydh dha varthusyon aswonnys y'n tewolgow : ha'th ewnder yn tir ankov?

¹³ Mes my a gri dhis rag gweres, A Arloedh : hag y'n myttin y teu ow fysadow a-dheragos.

¹⁴ Prag, A Arloedh, y skonydh ow enev : prag y kudhydh dha fas ragov?

¹⁵ Truan veuv ha parys dhe verwel dhiworth ow yowynkneth : my re borthas own ahanas, hag yn desper ov vy.

¹⁶ Dha gonnar res eth dresov : own ahanas re'm distruis.

¹⁷ I a dheuth a-dro dhymm oll an jydh avel dowr : i a omsettyas a-dro dhymm a bub tu.

¹⁸ Karer ha koweth a bellhasys dhiworthiv : hag yma ow aswonnesigyon yn tewlder.