Salmow 85 - An Sowter 1997 2023

SALM 85. Benedixisti, Domine.

¹ Ty re beu grassyes, A Arloedh, orth dha dir : ty re dreylyas kethneth Yakob.

² Ty re avas kammweyth dha bobel : ha kudha oll aga fegh.

³ Ty re gemmeras dhe-ves oll dha sorr : ty re dreylyas dhiworth dha sorr fers.

⁴ Treyl ni, A Dhuw agan selwyans : ha gas dha sorr orthyn.

⁵ A vydh sorr dhis orthyn bynitha : a ystynnydh dha sorr a unn henedh dhe'n nessa?

⁶ A ny dreylydh ha'gan bewhe ni arta : rag may lowenhaho dha bobel ynnos?

⁷ Diskwa dha dregeredh dhyn ni, A Arloedh : ha gront dhyn dha selwyans.

⁸ My a woslow orth an pyth a lever Duw an Arloedh : rag ev a lever kres dh'y bobel ha dh'y syns; mes na dreylyens arta dhe follneth.

⁹ Yn hwir yma y selwyans ogas dhe'n re a berth own anodho : may trykko golewder yn agan tir.

¹⁰ Tregeredh ha gwirder re omguntellas : gwiryonedh ha kres re ammas an eyl dh'y gila.

¹¹ Gwirder a egin dhiworth an nor : hag ewnder a vir war-woeles dhiworth nev.

¹² Yn hwir an Arloedh a re dader : ha'gan tir a re y drevas.

¹³ Ewnder a a-dheragdho : ha kres a gerdh yn fordh y olyow.