Salmow 84 - An Sowter 1997 2023

SALM 84. Quam dilecta.

¹ Ass yw karadow dha drigvaow : A Arloedh an luyow!

² Ow enev yw hirethek, hi a yeun ynwedh war-lergh klosyow an Arloedh : ow holonn ha'm kig a arm yn lowen war an Duw bew.

³ An golvan re gavas chi, ha'n wennel neyth rygdhi hi may hworro hy ydhnigow : dha alteryow jy, A Arloedh an luyow, ow Myghtern ha'm Duw.

⁴ Gwynnvys an re a drig y'th chi : prest y fydhons orth dha wormel.

⁵ Gwynnvys an den may 'ma y nerth ynnos jy : ha'th fordhow yn y golonn.

⁶ Pan dremenons dre nans Baka, y'n gwrons tyller a fentynyow : ha'n glaw a-varr a'n kudh gans bennathow.

⁷ Yth onsa nerth dhe nerth : pubonan a vydh gwelys a-rag Duw yn Sion.

⁸ A Arloedh, Duw an luyow, klew ow fysadow : goslow, A Dhuw Yakob.

⁹ Gwel agan skoes, A Dhuw : ha mir orth fas dha Untys.

¹⁰ Rag unn jydh y'th klosyow : yw gwell ages mil yn ken le.

¹¹ Gwell via genev bos porther yn chi ow Duw : ages annedhi tyldow sherewneth.

¹² Rag an Arloedh Duw yw howl ha skoes : an Arloedh a re ras ha golewder, ha ny skon ev a ri dader vytholl dhe'n re a gerdh yn tivlam.

¹³ A Arloedh luyow : gwynnvys an den a worr y fydhyans ynnos jy.