Salmow 8 - An Sowter 1997 2023

SALM 8. Domine, Dominus noster.

¹ A Arloedh, agan Arloedh, ass yw bryntin dha Hanow yn oll an norvys : ty neb re worras dha wolewder a-ugh an nevow!

² Yn-mes a anow fleghigow ha'n re ow tena ty re fastyas nerth drefenn dha eskerens : rag may tiswrylli an eskar ha'n dialor.

³ Pan virav orth an nevow, ober dha vysies : an loer ha'n ster a wrussys aga fastya,

⁴ Pyth yw den may perthydh kov anodho : ha mab-den may hwredh vri orto?

⁵ Ty re'n gwrug nebes isella ages an eledh : ha'y guruna gans golewder hag enor.

⁶ Ty a ros dhodho mestrynses war wriansow dha dhiwleuv : ty re worras pup-tra yn-dann y dreys,

⁷ Oll deves hag oghen : hag ynwedh bestes an gwel,

⁸ Ydhyn an nevow ha puskes an mor : kekemmys a dremen dre hynsyow an moryow.

⁹ A Arloedh agan Arloedh : ass yw bryntin dha Hanow yn oll an norvys.