Salmow 79 - An Sowter 1997 2023

SALM 79. Deus, venerunt.

¹ A Dhuw, an kenedhlow re dheuth y'th ertach : i re dhefolas dha dempel sans, ha gorra Yerusalem yn bern a vagoryow.

² I re ros korfow dha wesyon avel boes dhe ydhyn an nevow : ha kig dha syns dhe vestes an nor.

³ I re skoellyas aga goes avel dowr a-dro dhe Yerusalem : ha nyns esa denvyth a's ynkleutthya.

⁴ Ni re dheuth ha bos mewl dh'agan kentrevogyon : skorn ha ges dhe'n re usi yn agan kyrghynn.

⁵ Pygemmys prys, A Arloedh? A vydhydh serrys bynitha : a lesk dha avi avel tan?

⁶ Dyllo dha gonnar war an kenedhlow na'th aswonnis : ha war an gwlaskordhow na elwis war dha Hanow.

⁷ Rag i re dhevoryas Yakob : ha ravna y annedh.

⁸ Na borth kov a gammweythresow agan hendasow, des dha druedh dhyn ni yn skon : rag gyllys pur isel on ni.

⁹ Gweres dhyn ni, A Dhuw agan selwyans, a-barth golewder dha Hanow : gwra agan delivra, ha kudh agan peghosow, a-barth dha Hanow.

¹⁰ Prag y lever an kenedhlow : ‘Ple'ma aga Duw?’

¹¹ Bedhes diskwedhys dhe'n kenedhlow yn agan golok ni : dial rag an goes skoellys a'th wesyon.

¹² Des kynvann an prisner a-dheragos : herwydh meuredh dha nerth, gwith an re dampnys dhe'n mernans.

¹³ Daskorr seythplek dhe askra agan kentrevogyon : rag an skorn ma'th skornsons jy, A Arloedh.

¹⁴ Ytho ni, dha bobel ha deves dha beurva, a woer gras dhis bynitha : ni a dheriv dha wormola a unn henedh dhe'n nessa.