Salmow 74 - An Sowter 1997 2023

SALM 74. Ut quid, Deus?

¹ Prag, A Dhuw, re'gan skonsys bynitha: prag y feg dha sorr orth deves dha beurva?

² Porth kov a'th kuntelles a brensys seuladhydh : loeth dha ertach a dhasprensys, ha menydh Sion may trigsys ynno.

³ Treyl dha gammow troha'n magoryow nevra a bes : an sherewneth oll re wrug an eskar y'n sentri.

⁴ Usa re wrug dha eskerens yn mysk dha guntellva : i a dhrehav aga baneryow avel toknys.

⁵ Haval ens i dhe dus esa ow hakkya : gans boelyow war goeswik dew.

⁶ Ha lemmyn i a dhral oll an prennweyth gravys : gans boelyow ha mortholow.

⁷ I re worras tan y'th sentri : bys y'n dor i re dhefolas trigva dha Hanow.

⁸ I a leveris yn aga holonn, ‘Gwren ni aga diswul yn tien’ : i re loskas oll kuntellvaow Duw y'n pow.

⁹ Ny welyn agan toknys, nyns eus profoes byth moy : ha nyns eus yn agan mysk neb a wodhvo pygemmys prys.

¹⁰ Pygemmys prys, A Dhuw, y hwra an eskar ges : a dhispres an eskar dha Hanow bys vykken?

¹¹ Prag y tennydh dha leuv, dha leuv dhyghow, war-dhelergh : kemmer hi dhiworth dha askra ha'ga hisya.

¹² Rag Duw re beu ow myghtern bythkweth : ow kul selwyans a-berth y'n norvys.

¹³ Ty a rannas an mor dre dha nerth : ty a dorras pennow an dragones y'n dowrow.

¹⁴ Ty a derris pennow Lawethan dhe demmyn : ha'y ri avel boes dhe'n bobel trigys y'n difeyth.

¹⁵ Ty a folsas an fenten ha'n fros : ty a dhesyghas avonyow prest ow resek.

¹⁶ Ty a bew an jydh, dhiso jy ynwedh yw an nos : ty re bareusis an golow ha'n howl.

¹⁷ Ty re settyas oll oryon an nor : ty re wrug hav ha gwav.

¹⁸ Porth kov a hemma, fatell wrug an eskar ges A Arloedh : ha fatell dhispresyas an bobel foll dha Hanow.

¹⁹ Na ro enev dha durenn dhe'n goedhviles : na ankov bewnans dha voghosogyon bys vykken.

²⁰ Gwra vri a'n kevambos : rag tylleryow tewl an nor yw leun a annedhow garowder.

²¹ Na dhehweles an den truan yn disenor : gormeles an boghosek ha'n edhommek dha Hanow.

²² Sav, A Dhuw, pled dha gen : porth kov a'n despit gwrys dhis gans an foll oll an jydh.

²³ Na ankov lev dha eskerens : tros an re a sev er dha bynn a voghha pub eur oll.