Salmow 73 - An Sowter 1997 2023

SALM 73. Quam bonus Israel!

¹ Da yn hwir yw Duw orth Ysrael : orth an re yw glan aga holonn.

² Byttegyns nammna drebuchyas ow threys : ogas disevys o ow hammow.

³ Rag my a borthas envi orth an re woethus : pan welis vy sewenyans an debeles.

⁴ Rag nyns eus dhedha gloesow : yagh ha krev yw aga horfow.

⁵ Nyns yns i yn poenvotter dell yw tus erell : ha nyns yns i pystigys dell yw tus erell.

⁶ Rakhenna yma goeth a-dro dh'aga honna avel torgh : garowder a's kudh avel kweth.

⁷ Aga dewlagas a hwedh gans tewder : i a's teves moy ages konsayts aga holonn.

⁸ I a wra ges, ha kewsel yn spitus : i a wodros arwask, ughel aga fenn.

⁹ I re settyas aga ganow erbynn an nevow : ha'ga thaves a gerdh der an nor.

¹⁰ Rakhenna ow fobel a dreyl dhedha : ha lapya oll aga lavarow avel dowr.

¹¹ Hag i a lever, Fatell woer Duw : eus godhvos gans an Ughella?

¹² Otta, yndella yw an debeles : attes yns i pup-prys, ha'ga rychys a voghha.

¹³ Devri my re lanhas ow holonn yn euver : ha golghi ow diwleuv yn gwiryonsys.

¹⁴ Rag oll an jydh yth en vy gweskys : ha pystigys pub myttin.

¹⁵ Mar lavarren, ‘Yn kettella y kowsav vy’ : my a draytas henedh dha fleghes.

¹⁶ Pan ombrederis fatell gonvedhyn vy hemma, poenvotter o ev y'm golok vy,

¹⁷ Ernag yth vy yn sentri Duw : ena y konvedhis vy aga diwedh i.

¹⁸ Sur, ty a's gorras yn tylleryow slynk : ty a wrug dhedha koedha yn terroes.

¹⁹ Fatell ons distruys yn unn lamm : skubys glan dhe-ves gans browaghow!

²⁰ Avel hunros pan dhifun den : A Arloedh, pan dhifunydh jy, ty a dhispres aga imajys tremenadow.

²¹ Rag moredhek o ow holonn : ha gloesow a envi eth der ow diwloneth.

²² Mar dalsogh en vy, ha diskians : kepar ha lodhen en vy a-dheragos.

²³ Byttegyns yth esov vy prest genes : ty re'm synsis er ow leuv dhyghow.

²⁴ Gans dha gusul ty a'm lew : ha wosa henna ow hemmeres yn golewder.

²⁵ Piw a'm beus y'n nevow marnas ty : ha nyns eus travyth war an nor a yeunniv marnas ty.

²⁶ Ow hig ha'm kolonn a fyll : mes Duw yw nerth ow holonn ha'm rann bys vykken.

²⁷ Rag otta, an re usi pell dhiworthis a dhe goll : ty re dhistruis oll an re a wra horyans er dha bynn.

²⁸ Mes da yw ragov dos ogas dhe Dhuw, my re wrug an Arloedh Duw ow skovva : rag may teriffiv dha wriansow oll.