Salmow 72 - An Sowter 1997 2023

SALM 72. Deus, judicium.

¹ A Dhuw, ro dha vreusow dhe'n Myghtern : ha'th ewnder dhe vab an Myghtern.

² Re vreusso ev dha bobel gans ewnder : ha'th voghosogyon gans gwirvreus.

³ Re dhrollo an menydhyow kres dhe'n bobel : ha'n brennow dri ewnder.

⁴ Re vreusso ev an voghosogyon yn mysk an bobel : ha sawya mebyon an den edhommek, ha brewi an den a'm gwask.

⁵ Re borthons own ahanas hedre vo an howl : ha hedre vo an loer, a unn henedh dhe'n nessa.

⁶ Re dhiyskynno avel glaw war an gwels goera : avel kowasow a dhowrha an dor.

⁷ Re vleujyowo gwiryonedh yn y dhydhyow : ha palster kres, erna hettho an loer.

⁸ Re'n jeffo maystri a vor dhe vor : ha dhiworth an avon bys yn pennow an norvys.

⁹ Re omblekko a-dheragdho an re usi trigys y'n difeyth : ha'y eskerens lapya an doust.

¹⁰ Re dhrollo myghternedh Tarshish ha'n ynysow trubyt : ha myghternedh Sheba ha Seba dri rohow.

¹¹ Re omblekko myghternedh oll a-dheragdho : hag oll an kenedhlow bos y sojets.

¹² Rag ev a dhelirv an edhommek pan gri rag gweres : ha'n boghosek ma nag eus dhodho gwereser.

¹³ Ev a gemmer truedh a'n den gwann ha'n den edhommek : hag ev a selow enevow an edhommogyon.

¹⁴ Ev a bren aga enev dhiworth arwask ha garowder : ha drudh vydh aga goes yn y wolok ev.

¹⁵ Re vewo, ha dhodho re bo res owr dhiworth Sheba : re byssons ragdho heb hedhi, ha'y venniga oll an jydh.

¹⁶ Re bo kals ys y'n tir ow tegrena war benn an menydhyow : re bo y frut avel Lebanon, ha re sewenno tus an sita avel gwels an dor.

¹⁷ Re dhurryo y Hanow bys vykken; re bo y Hanow fastys hedre vo an howl : ena tus a omvennik dredho; an kenedhlow oll a'n gelow gwynnvys.

¹⁸ Benniges re bo an Arloedh Duw, Duw Ysrael : neb y honan a wra marthusyon;

¹⁹ Ha benniges re bo y Hanow gloryus bynitha : hag oll an nor a vydh lenwys a'y wolewder. Amen hag Amen.