Salmow 69 - An Sowter 1997 2023

SALM 69. Salvum me fac.

¹ Salw vy, A Dhuw : rag an dowrow re dheuth bys y'm enev.

² My a sedh yn leysyek dhown, ma nag eus tyller may seffiv : my re dheuth yn dowrow down, may hwra an livow resek warnav.

³ Skwith ov vy ow karma; sygh yw ow bryansenn: ow dewlagas a fyll, ha my ow kortos ow Duw.

⁴ Moy es blewennow ow fenn yw an re a'm kas heb ken : lies yw an re a vynn ow distrui, ow fals eskerens; an pyth na wrug vy y ladra, a wrav vy y daskorr?

⁵ A Dhuw, ty a aswonn ow follneth, ha nyns yw ow hammwriansow kudhys ragos.

⁶ Na berthes meth a'm govis vy an re a'th worta, A Arloedh Duw an luyow : na vedhes konfondys a'm govis vy an re a'th hwila, A Dhuw Ysrael.

⁷ Rag a-barth dhiso jy y perthis vy bismer : despit re gudhas ow fas.

⁸ My re dheuth ha bos estren dhe'm breder : hag alyon dhe fleghes ow mamm.

⁹ Rag tan ow holonn a-barth dha ji re'm kollonkas : ha despit an re a'th skorn re goedhas warnav vy.

¹⁰ Pan wrugavy dhe'm enev kyni gans penys : treylys o henna yn mewl dhymm.

¹¹ Ha my a omwiskas yn yskar : my eth ha bos ensampel dhedha.

¹² An re a esedh y'n porth a gews er ow fynn : ha'n bennow-medhow a gan ahanav yn ges.

¹³ Mes ow fysadow yw dhiso jy, A Arloedh : yn prys plegadow, A Dhuw, gorthyp dhymm y'th tregeredh veur, yn gwirder dha selwyans.

¹⁴ Gwra ow delivra dhiworth an leysyek, rag na setthiv : gas vy dhe vos delivrys dhiworth an re a'm kas, hag yn-mes a dhowrow down.

¹⁵ Na as an liv dhe frosa dresov, ha na as an downder dhe'm kollenki : ha na as an pytt dhe dhegea y anow warnav.

¹⁶ Gorthyp dhymm, A Arloedh, rag da yw dha dregeredh : treyl dhymmo vy, herwydh dha druedh meur.

¹⁷ Ha na gudh dha fas rag dha was, drefenn ow bos yn anken : gorthyp dhymm yn skon.

¹⁸ Deus nes dhe'm enev, ha'y brena : gwra ow delivra dhiworth ow eskerens.

¹⁹ Ty a aswonn ow mewl, ha'm meth, ha'm despit : yma oll ow eskerens a-dheragos.

²⁰ Mewl re dorras ow holonn; ha paynys bras a'm beus : my a hwilas neb a gemmerra truedh ahanav, mes nyns esa; ha konforters, mes ny's kevis.

²¹ I a ros dhymm ynwedh bystel rag ow boes : hag y'm syghes i a ros dhymm aysel.

²² Bedhes aga moes antell a-dheragdha : ha'ga offrynnow kres, bedhens maglenn.

²³ Bedhes aga dewlagas tewl rag na wellons : ha gwra dh'aga diwglun prest krena.

²⁴ Dyllo warnedha dha goler : ha re wrello dha sorr fers aga sesya.

²⁵ Bedhes aga annedh ynyal : na vedhes triger yn aga thyldow.

²⁶ Rag i a helgh an den a wrussys y weskel : hag ynkressya galar an re a vrewsys.

²⁷ Keworr kammweyth dh'aga hammweyth i : ha na dhens i y'th ewnder.

²⁸ Bedhens i defendys dhe-ves a lyver an re vew : ha na vedhens i skrifys yn mysk an re wiryon.

²⁹ Ha my, truan ov vy ha poenvosek : re'm drehaffo dha selwyans, A Dhuw.

³⁰ My a wormel Hanow Duw gans kan : ha my a'n meurhav gans grasyans.

³¹ Ha hemma a vydh gwell gans an Arloedh ages ojyon : po ages lodhen ha dhodho kern ha karnow.

³² An re hwar a'n gwelas, ha lowen yns i : hwilewgh Duw, ha'gas kolonn a vew.

³³ Rag an Arloedh a glew an re edhommek : ha ny dhispres ev an brisnoryon.

³⁴ Gormeles ev nev ha nor : an moryow ha pup-tra eus ow slynkya ynna.

³⁵ Rag Duw a selow Sion, ha drehevel sitys Yuda : hag i a drig ena ha'y ferghenna.

³⁶ Has y wesyon ynwedh a's erit : ha'n re a gar y Hanow a drig ynni.