Salmow 66 - An Sowter 1997 2023

SALM 66. Jubilate Deo.

¹ Gwrewgh tros heudhik dhe Dhuw, oll an nor : kenewgh gordhyans y Hanow, gwrewgh dh'y wormola bos gloryus.

² Leverewgh dhe Dhuw, Ass osta euthyk y'th wriansow : dre vraster dha nerth yth ombleg dha eskerens dhiso jy.

³ Oll an nor a'th wordh : ha kana dhis, ha gormel dha Hanow.

⁴ Dewgh, ha gwelewgh gwriansow Duw : euthyk yw ev yn y weythres orth mebyon den.

⁵ Ev a dreylyas an mor dhe dir sygh : mayth ethons der an avon war dreys; ena ni a lowenhas ynno.

⁶ Ev a rewl der y nerth bynitha; y dhewlagas a aspi an kenedhlow : na vedhes an re worth ughelhes.

⁷ Bennigewgh agan Duw, hwi boblow : ha gwrewgh dhe lev y wormola bos klewys;

⁸ Neb a with agan enev yn bewnans : ha ny as agan treys dhe drebuchya.

⁹ Rag ty, A Dhuw, re'gan provas : ty re'gan assayas, dell yw arghans assayys.

¹⁰ Ty a gasas dhyn koedha y'n roes : ty a worras ahwer war agan diwglun.

¹¹ Ty re wrug dhe dus marghogeth dres agan pennow : ni a dremenas dre dan ha dre dhowr, mes ty a'gan dros yn tyller ledan.

¹² My a dheu y'th chi gans offrynnow leskys : ha my a dal dhis ow ambosow, a leveris ow diwweus hag a gewsis ow ganow pan esen yn poenvos.

¹³ My a brof dhis offrynnow leskys a enyvales peskys, gans ynkys hordhes : my a offrynn lodhnow gans gever.

¹⁴ Dewgh ha klewewgh, oll hwi a berth own a Dhuw : ha my a dheriv an pyth a wrug ev rag ow enev.

¹⁵ My a elwis warnodho gans ow ganow : hag yth esa gormola war ow thaves.

¹⁶ Mar kwellen vy sherewneth y'm kolonn : ny'm klewsa an Arloedh.

¹⁷ Mes Duw yn hwir re glewas : ev re woslowas orth lev ow fysadow.

¹⁸ Benniges re bo Duw, na dreylyas ow fysadow dhe-ves : na skonya ri dhymm y dregeredh.