Salmow 63 - An Sowter 1997 2023

SALM 63. Deus, Deus meus.

¹ A Dhuw, ty yw ow Duw : my a'th hwila dihwans.

² Yma syghes dhe'm enev war dha lergh, ow hig a'n jeves hireth ragos : yn tir kras ha sygh ma nag eus dowr.

³ Yn kettella re viris vy orthis y'n sentri : dhe weles dha nerth ha'th wolewder.

⁴ Rag gwell yw dha dregeredh ages bewnans : ow diwweus a'th wormel.

⁵ Ytho my a'th vennik hedre vewiv : my a dhrehav ow diwleuv dhe'th Hanow.

⁶ Ow enev a vydh kontentys kepar ha dell ve gans mer ha blonek : ha'm ganow a'th wormel gans diwweus heudhik,

⁷ Pan borthav kov ahanas war ow gweli : ha prederi ahanas yn goelyow an nos.

⁸ Rag ty re beu ow gweres : hag yn skeus dha eskelli y kanav gormola.

⁹ Ow enev a len orthis : dha leuv dhyghow a'm menten.

¹⁰ Mes an re a hwila ow enev rag y dhistrui : yth ons yn rannow isella an nor.

¹¹ I a vydh delivrys dhe nerth an kledha : i a vydh rann dhe'n owrgeun.

¹² Mes an Myghtern a lowenha yn Duw; oll an re a de yn y Hanow ev a vost : mes ganow an re a wowlever a vydh deges.