Salmow 62 - An Sowter 1997 2023

SALM 62. Nonne Deo?

¹ Ow enev yn tevri a worta an Arloedh : dhiworto y teu ow selwyans.

² Ev y honan yw ow harrek ha'm selwyans : ow dinas ma na vydhav disevys nevra.

³ Pygemmys prys y settyewgh war dhen : orth y voldra, hwi oll, avel fos kromm, po avel ke herdhys yn-nans?

⁴ I a omgusul unnweyth fatell yllons y dewlel dhe'n dor dhiworth y ughelder : i a gemmer plesour yn gowyow; i a vennik gans aga ganow, mes i a volleth yn aga holonn.

⁵ Ow enev, gorta Duw y honan : rag ynno ev yma ow govenek.

⁶ Ev y honan yw ow harrek ha'm selwyans : ow dinas, ma na goetthiv.

⁷ Yn Duw yma ow selwyans ha'm gordhyans : ev yw karrek ow nerth, hag yn Duw yma ow skovva.

⁸ Trestyewgh ynno ev pup-prys, A bobel : dinewewgh agas kolonn a-dheragdho, rag Duw yw agan skovva.

⁹ Yn tevri, euveredh yw tus isel, ha tus ughel yw gow : y'n vantol yth ons i war-vann, skaffa yns i es euveredh.

¹⁰ Na drestyewgh yn garowder, ha na fydhyewgh yn euver yn ladrans : mar moghha rychys, na worrewgh agas kolonn warnodho.

¹¹ Unnweyth re gewsis Duw, my re glewas hemma diwweyth : bos galloes dhe Dhuw.

¹² Ha dhiso jy, A Arloedh, yma tregeredh : rag ty a attal dhe bub huni herwydh y oberow.