Salmow 59 - An Sowter 1997 2023

SALM 59. Eripe me de inimicis.

¹ Gwra ow delivra dhiworth ow eskerens, A Dhuw : gwith vy rag an re a sev er ow fynn.

² Gwra ow delivra dhiworth an dhrogoberoryon : ha gwra ow sawya a'n dus woesek.

³ Rag otta, i a gontrewayt ow enev : an re alloesek a omguntell er ow fynn, heb kammweyth na pegh genev, A Arloedh.

⁴ Poenya a wrons i hag ombareusi heb kammweyth genev : difun dhe'm gweres, ha mir.

⁵ Ha ty, A Arloedh Duw an luyow, Duw Ysrael, difun dhe wul vri a'n kenedhlow oll : na vydh grassyes orth an fals dhrogoberoryon.

⁶ I a dhehwel y'n gorthugher : i a dheskern avel ki ha poenya a-dro y'n sita.

⁷ Otta, usa wrons gans aga ganow, hag yma kledhedhyow yn aga gweusyow : ow leverel, ‘Piw a glew?’

⁸ Mes ty, A Dhuw, a wra ges anedha : ty a hwerth orth oll an kenedhlow.

⁹ Ow nerth vy, my a'th worta : rag Duw yw ow dinas.

¹⁰ Duw ow thregeredh a a-dheragov : Duw a wra dhymm gweles ow mynnas war ow eskerens.

¹¹ Na's ladh, ma na ankoffo ow fobel : gwra i dhe wandra gans dha nerth, ha'ga dri dhe'n dor, A Arloedh agan skoes.

¹² Rag pegh aga ganow, ha geryow aga gweusyow, bedhens i kemmerys yn aga goeth : ha rag an mollethi ha'n gowleverel a leverons,

¹³ Gwra aga distrui y'th sorr, distru, rag na vons namoy : godhvydhens i Duw dhe rewlya yn Yakob, ha bys yn pennow an nor.

¹⁴ Hag y'n gorthugher i a dhehwel : i a dheskern avel ki ha poenya a-dro y'n sita.

¹⁵ I a wander a-derdro rag boes : ha krodhvolas mar ny gevons lowr.

¹⁶ Mes my a gan a'th nerth, ha my a gan yn ughel a'th tregeredh y'n myttin : rag ty re beu ow dinas, ha skovva yn dydh ow anken.

¹⁷ Dhiso jy, ow nerth, y kanav gormola : rag Duw yw ow dinas, an Duw a'm tregeredh.