Salmow 55 - An Sowter 1997 2023

SALM 55. Exaudi, Deus.

¹ Ro skovarn, A Dhuw, dhe'm pysadow : ha na omgudh rag ow govynnadow.

² Goslow orthiv, ha gorthyp dhymm : grevys ov y'm krodhvol, ha gul kynvann,

³ Drefenn lev an eskar, drefenn gwask an tebelwas : rag i a dhre trobel warnav, hag yn sorr i a'm kas.

⁴ Ow holonn yw paynys yn feur a-bervedh ynnov : hag euth ankow re goedhas warnav.

⁵ Own ha skruth re dheuth warnav : hag kren re'm kudhas.

⁶ Ha my a leveris, ‘A pe genev eskelli avel kolomm : ena y hwrussen vy nija dhe-ves ha powes.

⁷ Otta, my a wandersa a-bell : ha triga y'n difeyth.

⁸ My a fisa toth men dhe skovva : rag an korwyns ha'n hager awel.’

⁹ Distru, A Arloedh, ha fols aga thavosow : rag my re welas garowder ha strif y'n sita.

¹⁰ Dydh ha nos ymons i a-dro dhedhi war hy fosow : yma dregynn ha meschyv a-bervedh ynni.

¹¹ Yma terroes a-bervedh ynni : ny dhiberth arwask na falsuri dhiworth hy stretys.

¹² Rag ny veu eskar neb a'm skornyas : mara pe, my a'n porthsa.

¹³ Ha nyns o an den a'm kasas neb a'm despityas : mara pe, my a omgudhsa ragdho;

¹⁴ Mes ty, den avelov vy : ow heskoweth, ha'm kothman.

¹⁵ Ni a geskewsi yn hweg an eyl gans y gila : ha ni a gerdhi yn chi Duw gans an routh.

¹⁶ Des ankow warnedha, ha diyskynnens yn few dhe ifarn : rag yma sherewneth yn aga annedhow, hag yn aga mysk.

¹⁷ Mes my a elow war Dhuw : ha'n Arloedh a'm selow.

¹⁸ Y'n gorthugher hag y'n myttin, ha dhe hanter-dydh my a grodhvol ha kyni : hag ev a glew ow lev.

¹⁹ Ev a dhelivras ow enev yn kres dhiworth an gas o er ow fynn : rag yth esa lies huni a strivyas genev.

²⁰ Duw a glewvydh hag a worthyp dhedha, ev neb re reynyas war y dron bythkweth : Rag nyns eus treylvaow dhedha, ha ny berthons own a Dhuw.

²¹ Ev re worras y leuv erbynn an re usi yn kres ganso : ev re dorras y gevambos.

²² Aga ganow o levenna es amanynn, mes yth esa bresel yn aga holonn : aga lavarow o medhella ages olew, mes yth ens i kledhedhyow noeth.

²³ Towl dha vegh war an Arloedh, hag ev a'th sosten : ny as ev nevra an re wiryon dhe drebuchya.

²⁴ Mes ty, A Arloedh, a's gorr yn-nans dhe doll an pytt : ny vew tus woesek ha fals moy ages hanter aga dydhyow; byttegyns my a drest ynnos jy.