Salmow 51 - An Sowter 1997 2023

SALM 51. Miserere mei, Deus.

¹ Bydh grassyes orthiv, A Dhuw, herwydh dha dregeredh : herwydh dha druedh meur defend dhe-ves ow hammweythresoww.

² Golgh vy yn tien a'm anewnder : ha glanha vy dhiworth ow fegh.

³ Rag my a aswonn ow hammwriansow : ha prest a-dheragov yma ow fegh.

⁴ Er dha bynn jy, ty dha honan, y peghis vy ha gul an drogober ma y'th wolok : rag may fes justifiys y'th lavar, ha divlam y'th vreus.

⁵ Otta, yn kammweyth y feuv vy dineythys : hag yn pegh y'm omdhuk ow mamm.

⁶ Otta, hwansek osta dhe wirder y'n rannow a-bervedh : hag yn-dann gel ty a dhysk dhymm furneth.

⁷ Purha vy gans hyssop ha glan vydhav : golgh vy, ha my a vydh gwynna es ergh.

⁸ Gwra dhymm klewes lowena ha heudhder : may lowenhaho an eskern a vrewsys.

⁹ Kudh dha fas rag ow feghosow : ha defend dhe-ves oll ow hammweythresow.

¹⁰ Gwra kolonn lan ragov, A Dhuw : ha daswra ynnov vy spyrys len.

¹¹ Na dowl vy dhe-ves a'th fas : ha na gemmer a-dhiworthiv dha Spyrys sans.

¹² Daskorr dhymm lowena dha selwyans : ha menten vy gans dha Spyrys hel.

¹³ Ena y tyskav dha fordhow dhe'n dhrogoberoryon : ha peghadoryon a dhehwel dhis.

¹⁴ Gwra ow delivra dhiworth kabel-goes, A Dhuw, ty Dhuw ow selwyans : ha'm taves a gan yn lowen a'th ewnder.

¹⁵ A Arloedh, igor ow diwweus : ha'm ganow a dhiskwa dha wormola.

¹⁶ Nyns osta hwansek dhe sakrifis, poken my a'n rosa dhis : ny gemmerydh plesour yn offrynnow leskys.

¹⁷ Sakrifisow Duw yw spyrys trogh : kolonn drogh ha keudhesik, A Dhuw, ny dhispresydh.

¹⁸ Gwra da yn dha favour orth Sion : drehav fosow Yerusalem.

¹⁹ Ena ty a' fydh delit yn sakrifisow ewnder, offrynnow leskys ha kowlleskys : ena yth offrynnons lodhnow war dha alter.