Salmow 50 - An Sowter 1997 2023

SALM 50. Deus deorum.

¹ Duw an dhuwow, an Arloedh, re gewsis : ha gelwel an nor dhiworth drehevel an howl bys dh'y sedhes.

² Yn-mes a Sion, perfydh hy thekter : Duw re splannas.

³ Agan Duw a dheu, heb tewel : tan a dheber a-dheragdho, hag annawel veur a vydh a-dro dhodho.

⁴ Ev a elow war an nevow a-vann : ha war an nor, may freusso y bobel.

⁵ Kuntellewgh ow syns war-barth dhymmo vy : an re a wrug kevambos genev dre sakrifis.

⁶ Ha'n nevow a dheriv y ewnder : rag Duw y honan yw Breusyas.

⁷ Klew, ow fobel, ha my a gews : ha my a dheg dustuni er dha bynn, A Ysrael; my yw Duw, dha Dhuw jy.

⁸ Ny'th keredhav drefenn dha offrynnow : ha prest a-dheragov yma dha offrynnow leskys.

⁹ Ny gemmerav lodhen yn-mes a'th chi : na boghes yn-mes a'th korlannow.

¹⁰ Rag dhymmo vy yma pub best a'n koes : an chatel war vil venydh.

¹¹ My a aswonn oll ydhyn an menydhyow : ha dhymmo vy yma bestes an gwelyow.

¹² Mar porthen vy nown, ny lavarsen dhis : rag dhymmo vy yma oll an nor ha pup-tra eus ynno.

¹³ A dhebrav vy kig terewi : po eva goes gever?

¹⁴ Offrynn grasyans dhe Dhuw : ha kollanw dha ambosow dhe'n Ughella.

¹⁵ Ha galw warnav yn dydh anken : my a'th telirv, ha ty a wra ow gordhya.

¹⁶ Mes dhe'n tebelwas Duw a lever : ‘Pandr'a vern, ty dhe dherivas ow ordenansow, po ty dhe gemmeres ow hevambos yn dha anow?

¹⁷ Rag ty a gas dyskybleth : ha tewlel ow lavarow war dha lergh.

¹⁸ Pan welsys lader, ty a assentyas ganso : ha'th rann a veu gans an avoutroryon.

¹⁹ Ty a ros dha anow dhe sherewneth : ha'th taves a dhevis toell.

²⁰ Ty a esedh ha kewsel erbynn dha vroder : ty a guhudh mab dha vamm.

²¹ An taklow ma re wrussys, ha tewel a wrugavy; ty a brederis my dhe vos avelos jy : mes my a'th keredh, ha dri kuhudhans er dha bynn.

²² Prederewgh hemma, hwi neb a ankev Duw : ma na wrylliv agas skwardya, ha na vo nagonan dhe dhelivra.

²³ Neb a offrynn an sakrifis a rasyans a wra ow gordhya : ha dhe neb a wra y fordh yn ewn my a dhiskwa selwyans Duw.’