Salmow 5 - An Sowter 1997 2023

SALM 5. Verba mea auribus.

¹ Ro skovarn dhe'm geryow, A Arloedh : gwra vri a'm hanasa.

² Goslow orth lev ow kri, ow Myghtern, ha'm Duw : rag dhiso jy y pysav.

³ A Arloedh, y'n myttin ty a glew ow lev : y'n myttin my a orden ow fysadow orthis, ha goelyas.

⁴ Rag nyns osta Duw a gemmerro plesour yn sherewneth : ny yll drog triga genes jy.

⁵ Ny sev an re woethys y'th wolok : ty a gas an dhrogoberoryon oll.

⁶ Ty a dhistru an re a wowlever : an Arloedh a gas an gour goesek ha fals.

⁷ Mes my a dheu y'th chi dre dha dregeredh meur : my a ombleg troha'th tempel sans yn own ahanas.

⁸ Hembronk vy, A Arloedh, y'th ewnder drefenn ow eskerens : gwra dha fordh kompes a-dheragov.

⁹ Rag nyns eus lelder yn aga ganow : aga holonn yw leun a spit.

¹⁰ Aga lonk yw logel igor : i a fekyl gans aga thaves.

¹¹ Gwra dhedha perthi kessydhyans aga fegh, A Dhuw; koedhens i der aga husulyow aga honan : towl i dhe-ves herwydh aga lies treuspass; rag i re sevis er dha bynn.

¹² Mes lowenhes seul a hwila skovva ynnos : kanens i rag joy bynitha, rag ty dh'aga gwitha; ha bedhes heudhik ynnos jy an re a gar dha Hanow.

¹³ Rag ty, A Arloedh, a vennik an den gwiryon : ty a'n kudh gans favour kepar ha gans skoes.