Salmow 49 - An Sowter 1997 2023

SALM 49. Audite haec, omnes.

¹ Klewewgh hemma, oll an poblow : rewgh skovarn, oll an re usi trigys y'n norvys.

² Tus isel hag ughel : an den golusek ha'n den boghosek war-barth.

³ Ow ganow a gews a furneth : ha prederow ow holonn a re dhis konvedhes.

⁴ My a bleg ow skovarn dhe barabolenn : my a styr ow lavar tewl war an sowtri.

⁵ Prag y porthav own yn drog dydhyow : pan omsett kammweyth ow eskerens a-dro dhymm?

⁶ I a drest yn aga fythow : hag a vost yn braster aga rychys.

⁷ Mes devri ny yll nagonan anedha prena y vroder : na ri daspren dhe Dhuw ragdho;

⁸ Re gostek via daspren y enev : ha ny allses pe henna bynitha,

⁹ Rag may fewa bynitha : ha ma na wella an pytt.

¹⁰ Rag ev a wel tus skiansek dhe verwel, ha'n den anfur ha'n talsogh keffrys a dhe goll : ha gasa aga fythow dhe dus erell.

¹¹ Aga bedh yw aga chi bynitha : ha'ga annedhow a unn henedh dhe'n nessa; i a elow aga thiryow herwydh aga henwyn aga honan.

¹² Mes ny bes den yn enor : haval yw orth an bestes a verow.

¹³ Hemm yw fordh an re dalsogh : ha plegadow dh'aga henedh yw aga lavarow.

¹⁴ Avel deves ymons i gorrys yn ifarn, ankow a's bugel, ha'n re ewnhynsek a wra maystri warnedha y'n myttin : aga furv a beder yn ifarn, pell dhiworth aga chiow ughel.

¹⁵ Mes Duw a dhaspren ow enev dhiworth dalghenn ifarn : rag ev a'm degemmer.

¹⁶ Na borth own pan vo gour gwrys rych : pan vo splannder y ji moghhes.

¹⁷ Rag ny gemmer ganso travyth pan varwo : ny dhiyskynn y splannder war y lergh.

¹⁸ Rag ev a vennik y enev hag ev yn few : ha tus a'th wormel pan sewenydh.

¹⁹ Ev a dhe henedh y dasow : ny welons golow bynitha.

²⁰ Mes den yn y veuredh ny gonvedh : haval yw orth an bestes a verow.