Salmow 44 - An Sowter 1997 2023

SALM 44. Deus, auribus.

¹ A Dhuw, ni re glewas gans agan diwskovarn, agan tasow re venegas dhyn ni : an gweythres a wrussys yn aga dydhyow i, y'n termyn koth.

² Gans dha leuv ty a fesyas an kenedhlow, mes ty a's plansas yn aga le : ty a dhistruis an poblow, mes gul dhedha triga yn aga le.

³ Rag ny berghennsons an tir der aga kledha aga honan : ha nyns o aga bregh aga honan a ros budhogoleth dhedha;

⁴ Mes dha leuv dhyghow jy ha'th vregh, ha golow dha fas : rag ty a's kara.

⁵ Ty yw ow Myghtern, A Dhuw : gorhemmynn budhogoleth dhe Yakob.

⁶ Dredhos y herdhyn ni agan eskerens dhe'n dor : dre dha Hanow ni a stank an re a sev er agan pynn.

⁷ Rag ny drestyav y'm gwarak : nyns yw ow kledha a re dhymm an budhogoleth.

⁸ Mes ty a'gan delirv dhiworth agan eskerens : ha gul bismer dhe'n re a'gan kas.

⁹ Yn Duw re wrussyn ni bostya oll an jydh : ha ni a wormel dha Hanow bys vykken.

¹⁰ Byttegyns ty re'gan skonyas, ha'gan shamya : ha nyns edh jy yn-rag gans agan luyow.

¹¹ Ty a wra dhyn mos war-dhelergh dhiworth an eskar : ha'n re a'gan kas a raven dh'aga honan.

¹² Ty re'gan ros avel deves dhe vos dybrys : ha re'gan skattras yn mysk an kenedhlow.

¹³ Ty a werthas dha bobel a dravyth : ha dhiworth aga fris ny gemmersys prow.

¹⁴ Ty a wra dhyn bos mewl dh'agan kentrevogyon : skorn ha ges dhe'n re usi yn agan kyrghynn.

¹⁵ Ty a'gan gwra ensampel yn mysk an kenedhlow : ha gul dhe'n poblow shakya an penn orthyn.

¹⁶ Oll an jydh yma ow disenor a-dheragov : ha meth ow fas re'm kudhas,

¹⁷ Orth lev an den a skorn ha kabla : drefenn an eskar ha'n dialor.

¹⁸ Oll hemma re dheuth warnan, mes ny'th ankevsyn : ha ny wrussyn ni falsuri erbynn dha gevambos.

¹⁹ Ny dreylyas agan kolonn war-dhelergh : ha ny blegyas agan kammow yn-mes a'th hyns,

²⁰ Kyn y'gan brewsys yn tyller owrgeun : ha'gan kudha gans skeus ankow.

²¹ Mar ankevyn ni Hanow agan Duw, hag ystynn agan diwleuv dhe dhuw estren : a ny hwither Duw hemma? rag ev a woer kevrinyow an golonn.

²² A'th wovis jy yth on ni ledhys oll an jydh : reknys on ni avel deves dhe'n ladhva.

²³ Difun, prag y koskydh, A Arloedh : sav, na skon ni bynitha.

²⁴ Prag y kudhydh jy dha fas : hag ankevi agan anken ha'gan poenvotter?

²⁵ Rag agan enev yw plegys dhe'n doust : agan torr a len orth an dor.

²⁶ Sav, ha gweres dhyn ni : ha daspren ni a-barth dha dregeredh.