Salmow 42 - An Sowter 1997 2023

SALM 42. Quemadmodum.

¹ Kepar dell yeun an karow war-lergh goverow dowr : yn kettella y yeun ow enev war dha lergh, A Dhuw.

² Yma dhe'm enev syghes war-lergh Duw, an Duw bew : p'eur tov vy hag omdhiskwedhes a-dherag Duw?

³ Ow dagrow re beu ow bara dydh ha nos : hag i ow leverel dhymm oll an jydh, Ple'ma dha Dhuw?

⁴ My a berth kov a hemma, ow skoellya ow enev a-bervedh ynnov : fatell gerdhyn vy gans an routh orth aga hembronk dhe ji Duw;

⁵ Gans lev a lowena ha grasyans : yn mysk routh ow synsi goel.

⁶ Prag yth osta jy mar dhigolonnek, ow enev : ha prag yth hanesydh a-berth ynnov?

⁷ Trest yn Duw : rag my a'n gormel prest rag selwyans y fas.

⁸ Ow Duw, digolonnek yw ow enev a-bervedh ynnov : rakhemma my a berth kov ahanas a dir Yordan ha'n Hermonow, a venydh Misar.

⁹ Downder a elow dhe dhownder orth tros dha dhowrlammow : oll dha vordardh ha'th tonnow res eth dresov.

¹⁰ Mes an Arloedh a worhemmynn y dregeredh dydhweyth : ha nosweyth y gan a vydh genev, pysadow dhe Dhuw ow bewnans.

¹¹ My a lever dhe Dhuw ow harrek, Prag re'm ankevsys : prag yth av vy ow kyni, ha'n eskar orth ow gwaska?

¹² Ha'm eskern ow pos brewys, ow eskerens a'm skorn : ow leverel dhymm oll an jydh, Ple'ma dha Dhuw?

¹³ Prag yth osta jy mar dhigolonnek, ow enev : ha prag yth hanesydh a-berth ynnov?

¹⁴ Trest yn Duw : rag my a'n gormel prest, selwyans ow fas, ha'm Duw.