Salmow 41 - An Sowter 1997 2023

SALM 41. Beatus qui intelligit.

¹ Gwynnvys neb a wra vri a'n den gwann : an Arloedh a'n delirv yn dydh anken.

² An Arloedh a'n gwith hag a'n bewha; gwynnvys vydh ev war an nor : ha ny'n delivrydh dhe vodh y eskerens.

³ An Arloedh a'n menten war y weli pan yw klav : ty a dharbar y weli kowal yn y gleves.

⁴ My a leveris, Bydh grassyes orthiv, A Arloedh : yaghha ow enev, rag my re beghas er dha bynn.

⁵ Ow eskerens a lever drog er ow fynn : P'eur ferow ev, ha'y hanow a dhe goll?

⁶ Ha pan dheu ev dhe'm gweles, ev a lever euveredh : y golonn a guntell sherewneth dhedhi hi hy honan; pan a ev yn-mes, ev a'n dyllo a-les.

⁷ Oll an re a'm kas a hwyster war-barth er ow fynn : i a dewl pystik er ow fynn.

⁸ ‘Kleves fell’, yn-medhons, ‘a len orto : hag ev a'y wrowedh, ny sev arta.’

⁹ Ynwedh ow howeth ker ow honan may trestis vy ynno : neb a dhybris ow bara, re dhrehevis y wewenn er ow fynn.

¹⁰ Mes ty, A Arloedh, bydh grassyes orthiv : ha drehav vy rag mayth attylliv dhedha.

¹¹ Gans hemma y hwonn vy, ty dhe vos pes daahanav : drefenn na arm ow eskar yn trygh warnav.

¹² Ha my, ty a'm menten heb namm : ha'm gorra a-dheragos bynitha.

¹³ Benniges re bo an Arloedh, Duw Ysrael : bys vykken ha bynnari. Amen, hag Amen.