Salmow 40 - An Sowter 1997 2023

SALM 40. Expectans expectavi.

¹ My a wortas an Arloedh gans perthyans : hag ev a blegyas dhymm ha klewes ow kri.

² Hag ev a'm drehevis mes a'n pytt divlas, mes a'n pri leysek : ha gorra ow threys war garrek, ha fastya ow hammow.

³ Hag ev re worras kan nowydh y'm ganow, kan a wormola dh'agan Duw : lies huni a'n wel, ha perthi own, ha trestya y'n Arloedh.

⁴ Gwynnvys an gour re worras y fydhyans y'n Arloedh : ha na wra vri a'n re woethus na'n re a dreyl dhe falsuri.

⁵ Meur yw niver dha varthusyon a wrussys, A Arloedh ow Duw, ha'th towlow ragon : nyns eus par dhiso jy.

⁶ Mara's menekken vy, ha kewsel anedha : y fiens i moy es dell yllir aga nivera.

⁷ Nyns osta hwansek dhe sakrifis hag offrynn : mes ty re igoras ow diwskovarn.

⁸ Offrynn leskys hag offrynn peghes ny wovynnsys : Ena y leveris vy, ‘Otta, devedhys ov;

⁹ Yn rol an lyver yw skrifys ahanav.’ My re vynnas gul dha volonjedh, A Dhuw : yma dha lagha yn kres ow holonn.

¹⁰ My re dherivas ewnder y'n kuntelles meur : otta, ny fronnis ow diwweus, dell wodhes, A Arloedh.

¹¹ Ny gelis dha ewnder y'm kolonn : my re gewsis a'th wirder ha'th selwyans.

¹² Ny gelis dha dregeredh ha'th wirder : dhiworth an kuntelles meur.

¹³ Na skon dhymm dha druedh, A Arloedh : prest re'm gwittho vy dha dregeredh ha'th wirder.

¹⁴ Rag ankenyow diniver re dheuth a-dro dhymm; ow hammweythresow re'm dalghennas ma na allav mires yn-bann : moy aga niver yns i ages blewennow ow fenn, ha'm kolonn a fyll dhymm.

¹⁵ Dre dha vodh, A Arloedh, salw vy : A Arloedh, deus uskis dhe'm gweres.

¹⁶ Perthens i meth ha bedhens shyndys war-barth, an re a hwila ow enev dh'y dhiswul : bedhens i treylys war-dhelergh ha konfondys an re a lowenha y'm pystik.

¹⁷ Bedhens i yn ahwer drefenn aga meth : neb a lever dhymm, Aha, aha.

¹⁸ Lowenhes kemmys a'th hwila ha bedhens heudhik ynnos jy : ha myns a gar dha selwyans prest leverens, Re bo Duw meurhes.

¹⁹ Boghosek hag edhommek ov vy : mes an Arloedh a breder ahanav.

²⁰ Ty yw ow gwereser ha'm delivrer : A Arloedh, na wra delatya.