Salmow 37 - An Sowter 1997 2023

SALM 37. Noli aemulari.

¹ Na sorr drefenn an dhrogoberoryon : ha na borth avi orth an re a wra sherewneth.

² Rag avel gwels i a wedher yn skon : ha krina avel losow gwyrdh.

³ Trest y'n Arloedh ha gwra da : trig y'n tir, ha bedhes lenduri dha beurva.

⁴ Lowenha y'n Arloedh : hag ev a re dhis govynnadow dha golonn.

⁵ Kommytt dha fordh dhe'n Arloedh : trest ynno, hag ev a'n gwra.

⁶ Ev a wra dhe'th wiryonedh splanna avel golow : ha'th wirvreus avel hanter-dydh.

⁷ Bydh kosel a-dherag an Arloedh, ha gwra y wortos gans perthyans : na sorr drefenn an den a sewen yn y fordh, drefenn an gour a ober droktowlow.

⁸ Treyl dhiworth sorr, ha gas koler : na vrogh, ma na wrylli drogober.

⁹ Rag drogoberoryon a vydh treghys dhe-ves : mes an re a drest y'n Arloedh, i a erit an tir.

¹⁰ Hwath pols byghan ha ny vydh an tebelwas namoy : ty a hwither y dyller gans rach, ha ny vydh ev ena.

¹¹ Mes an re hwar a erit an tir : hag i a gemmer plesour yn kres leun.

¹² An tebelwas a dewl towl erbynn an den gwiryon : ha deskerni y dhyns orto.

¹³ An Arloedh a hwerth orto : rag ev a wel y dhydh ow tos.

¹⁴ An debeles re dennas an kledha ha plegya aga gwarak : dhe dhisevel an den truan ha'n boghosek, dhe ladha an re ewn aga fordh.

¹⁵ Aga kledha a dheu yn aga holonn i : ha'ga gwaregow a vydh terrys.

¹⁶ Gwell yw an boghes usi gans an den gwiryon : ages an rychys a debeles pals.

¹⁷ Rag breghow an debeles a vydh terrys : mes an Arloedh a venten an re wiryon.

¹⁸ An Arloedh a aswonn dydhyow an re dhivlam : ha'ga ertach a dhur bys vykken.

¹⁹ Ny berthons meth yn droktermyn : hag yn dydhyow esow i a vydh lenwys.

²⁰ Mes an debeles a dhe goll; hag eskerens an Arloedh a vydh avel splannder an peurvaow : i a dremen, yn mog y tremenons i.

²¹ An tebelwas a gyv kendon ha ny attal : mes an den gwiryon yw grassyes ha hel.

²² Rag an re bennigys ganso a erit an tir : ha'n re milligys ganso a vydh treghys dhe-ves.

²³ Kammow gour yw fastys gans an Arloedh : hag ev a gemmer plesour yn y fordh.

²⁴ Kyn koettho, ny vydh ev tewlys sket dhe-ves : rag an Arloedh a'n menten gans y leuv.

²⁵ Yowynk veuv, lemmyn koth ov vy : mes bythkweth ny welis an den gwiryon gesys, na'y has ow peggya bara.

²⁶ Oll an jydh ev yw grassyes hag a re kendon : hag yma bennath war y has.

²⁷ Treyl dhiworth drog ha gwra da : ha trig y'n tir bys vykken.

²⁸ Rag an Arloedh a gar gwirvreus, ha ny as y syns : gwithys yns i bynitha, mes has an debeles a vydh terrys dhe-ves.

²⁹ An re wiryon a erit an tir : ha triga ynno bys vykken.

³⁰ Ganow an den gwiryon a lever furneth : ha'y daves a gews a wirvreus.

³¹ Yma lagha y Dhuw yn y golonn : ny drebuch y gammow.

³² An tebelwas a aspi an den gwiryon : hag ev a assay y ladha.

³³ Ny wra an Arloedh y asa yn y leuv : ha ny re ev drogvreus er y bynn pan yw breusys.

³⁴ Trest y'n Arloedh, ha syns y fordh ev, hag ev a'th ughelha dhe erita an tir : pan vo an debeles treghys dhe-ves, ty a'n wel.

³⁵ My re welas an tebelwas didruedh : hag ev ow klasa avel baywydhenn las.

³⁶ Mes my a dremenas hag otta, nyns esa ol anodho : my a'n hwilas, ha nyns o kevys.

³⁷ Merk an den divlam, ha mir orth an den ewnhynsek : rag yma henedh dhe'n den a gres.

³⁸ Mes an dhrogoberoryon a vydh distruys war-barth : henedh an debeles a vydh treghys dhe-ves.

³⁹ Yma selwyans dhe'n re wiryon dhiworth an Arloedh : aga skovva yn termyn anken.

⁴⁰ An Arloedh a weres dhedha, ha'ga difres : ev a's difres a'n debeles, ha'ga selwel, rag i a hwila skovva ynno.