Salmow 36 - An Sowter 1997 2023

SALM 36. Dixit injustus.

¹ Kammweythres a gews dhe'n tebelwas a-bervedh yn y golonn : nyns eus own Duw a-dherag y dhewlagas.

² Rag ev a fekyl y honan a-dherag y dhewlagas y honan : na vydh gammweyth kasadow diskudhys.

³ Geryow y anow yw gwag ha toell : ev re astelas bos fur ha gul da.

⁴ Ev a dewl dregynn war y weli, hag ev a worr y honan yn fordh nag yw da : ny hepkorr sherewneth.

⁵ Yma dha dregeredh, A Arloedh, y'n nevow : ha'th lenduri a dhrehedh bys y'n ebron.

⁶ Dha ewnder yw kepar ha menydhyow Duw : dha vreusow yw kepar ha'n downder meur.

⁷ Ty, A Arloedh, a selow den hag enyval; ass yw drudh dha dregeredh, A Dhuw : mebyon den a hwila skovva yn-dann skeus dha eskelli.

⁸ I a vydh lenwys yn feur a helder dha ji : ha ty a wra dhedha eva dhiworth avon dha blesours.

⁹ Rag genes jy yma fenten bewnans : y'th wolow jy y hwelyn ni golow.

¹⁰ Ystynn dha dregeredh dhe'n re a'th aswonn : ha'th ewnder dhe'n re ewnhynsek aga holonn.

¹¹ Na dhes troes an den goethus er ow fynn : na'm herdhyes vy dhe-ves leuv an debeles.

¹² Ena re goedhas an dhrogoberoryon : tewlys yns i dhe'n dor, ha ny yllons sevel.