Salmow 33 - An Sowter 1997 2023

SALM 33. Exultate, justi.

¹ Lowenhewgh y'n Arloedh, hwi an re wiryon : gormola yw gwiw dhe'n re ewnhynsek.

² Gormelewgh an Arloedh gans telynn : kenewgh gormola dhodho gans sowtri a dheg kordenn.

³ Kenewgh dhodho kan nowydh : tennewgh an kerdyn yn konnyk, gans garmow ughel.

⁴ Rag ewn yw ger an Arloedh : hag oll y wriansow yw gwrys yn lenduri.

⁵ Ev a gar gwiryonedh ha gwirvreus : leun yw an norvys a dhader an Arloedh.

⁶ Dre er an Arloedh an nevow a veu gwrys : hag oll aga lu gans anall y anow.

⁷ Ev a guntellas dowrow an mor war-barth yn graghell : ev a worr an downderyow yn gwithvaow.

⁸ Perthes own a'n Arloedh oll an nor : seves yn euth anodho oll trigoryon an norvys.

⁹ Rag ev a gewsis hag yndella y feu gwrys : ev a worhemmynnis ha pup-tra a sevis yn fast.

¹⁰ An Arloedh a dhiswra kusul an kenedhlow : ev a dhiswra towlow an poblow.

¹¹ Kusul an Arloedh a sev bynitha : prederow y golonn a unn henedh dhe'n nessa.

¹² Gwynnvys an genedhel hag yw an Arloedh hy Duw : an bobel dewisys ganso dhe vos y ertach y honan.

¹³ An Arloedh a vir war-woeles dhiworth nev, hag a wel oll mebyon den : dhiworth tyller y drigva ev a vir orth oll trigoryon an norvys.

¹⁴ Ev a form aga holonnow yn kettep penn : ev a aspi oll aga gwriansow.

¹⁵ Nyns eus myghtern a allo bos selwys gans lu meur : nyns yw breselyas krev delivrys gans galloes meur.

¹⁶ Euveredh yw trestya yn margh rag selwyans : ha nyns yw denvyth selwys gans y nerth bras.

¹⁷ Otta, yma lagas an Arloedh war an re a berth own anodho : war an re a drest yn y dregeredh;

¹⁸ May teliffro aga enev dhiworth ankow : ha'ga gwitha yn few yn termyn nown.

¹⁹ Agan enev a worta an Arloedh : ev yw agan gweres ha'gan skoes.

²⁰ Rag agan kolonn a lowenha ynno : drefenn ni dhe drestya yn y Hanow sans.

²¹ Bedhes dha dregeredh, A Arloedh, warnan : kepar dell worryn agan trest ynnos.