Salmow 31 - An Sowter 1997 2023

SALM 31. In te, Domine, speravi.

¹ Ynnos jy, A Arloedh, y hwilav skovva : na as vy nevra dhe berthi meth; gwra ow delivra y'th ewnder.

² Pleg dha skovarn dhymm; gwra ow delivra yn uskis : bydh dhymm karrek grev, ha kastell dhe'm selwel.

³ Rag ty yw ow harrek grev ha'm kastell : a-barth dha Hanow, bydh ow hembrenkyas ha kevarwoedh vy.

⁴ Tenn vy mes a'n roes a gudhsons dhymm : rag ty yw ow skovva.

⁵ Y'th leuv jy y kemmynnav vy ow spyrys : ty re'm dasprenas, A Arloedh, Duw a wiryonedh.

⁶ My re gasas an re a wra vri a euveredh gwag : mes my a drest y'n Arloedh.

⁷ My a vydh heudhik ha lowenhe y'th tregeredh : rag ty re welas ow foenvos, hag aswonn ankenyow ow enev.

⁸ Ny'm gessys vy yn dorn an eskar : ty re worras ow threys yn tyller ledan.

⁹ Bydh grassyes orthiv, A Arloedh, rag yth ov vy yn ankres : ow lagas a fyll drefenn poenvos; ha'm enev ha'm torr ynwedh.

¹⁰ Rag ow bewnans yw difygys gans keudh, ha'm blydhynyow gans kynvann : ow nerth a fyll drefenn ow drogober, ha'm eskern a wedher.

¹¹ Skorn ov vy yn mysk ow eskerens oll, ha kyns oll yn mysk ow hentrevogyon, hag own dhe'n re aswonnys genev : an re a'm welas mes a ji a gildennas dhiworthiv.

¹² Ankevys ov vy kepar ha den marow gyllys mes a gov : yth ov vy avel lester trogh.

¹³ Rag my re glewas kabel lies huni : yth esa euth a bub tu, hag i owth omgusulya war-barth er ow fynn; i a dewlys towl dhe gemmeres ow bewnans.

¹⁴ Mes my a drestyas ynnos jy, A Arloedh : my a leveris, Ty yw ow Duw.

¹⁵ Yma ow thermynyow y'th leuv jy : gwra ow delivra dhiworth leuv ow eskerens ha dhiworth ow helghysi.

¹⁶ Gwra dhe'th fas golowi war dha was : salw vy a-barth dha dregeredh.

¹⁷ Na as vy dhe berthi meth, A Arloedh, rag my re elwis warnas : perthes an debeles meth, ha bedhens i tawesek y'n bedh.

¹⁸ Bedhes avlavar an gweusyow gowek : neb a lever erbynn an re wiryon yn howtyn, gans goeth ha despit.

¹⁹ Ass yw meur dha dhader, a dharbarydh rag an re a'th own : a wrussys rag an re a hwila skovva ynnos jy a-dherag mebyon den!

²⁰ Yn goskes dha fas ty a's kudh rag towlow den : ty a's kudh yn skovva, pell dhiworth strif tavosow.

²¹ Benniges re bo an Arloedh : rag ev re dhiskwedhas tregeredh marthys dhymm yn sita grev.

²² Rag my a leveris y'm toeth, ‘Treghys ov vy a-dherag dha dhewlagas’ : mes ty a glewas lev ow govynnadow pan griis vy warnas.

²³ Kerewgh an Arloedh, oll y syns ev : rag an Arloedh a with an re len, mes ev a dal yn hel dhe'n re a omdheg yn hwoethus.

²⁴ Bedhewgh krev ha bedhes agas kolonn konfortys : oll hwi a drest y'n Arloedh.