Salmow 30 - An Sowter 1997 2023

SALM 30. Exaltabo te, Domine.

¹ My a'th ughelha, A Arloedh, rag ty re'm drehevis : ha ny essys ow eskerens dhe lowenhe a'm govis.

² A Arloedh ow Duw, my a grias warnas : ha ty re'm yaghhas.

³ A Arloedh, ty re dhrehevis ow enev yn-bann dhiworth ifarn : ty re'm bewhas, ma na ylliv yn-nans dhe'n pytt.

⁴ Kenewgh gormola dhe'n Arloedh, hwi y syns ev : ha grassewgh dh'y Hanow sans.

⁵ Rag ny dhur y sorr saw pols byghan; yn y ras yma bewnans : oelva a dhur dres an nos, mes lowena a dheu y'n myttin.

⁶ Ha my, my a leveris y'm sewenyans : ‘Ny drebuchyav vy nevra.’

⁷ Y'th tader, A Arloedh, ty a wrussa dhymm sevel avel menydh krev : mes ty a gudhas dha fas, ha dyegrys veuv.

⁸ Warnas jy, A Arloedh, y helwis vy : hag orth an Arloedh y hwrugavy govynnadow.

⁹ Py gwayn a vydh y'm goes pan av vy yn-nans dhe'n pytt : a vydh an doust orth dha wormel, a vydh ev ow terivas dha wirder?

¹⁰ Klew, A Arloedh, ha bydh grassyes orthiv : A Arloedh, bydh ow gwereser.

¹¹ Ty re dreylyas ow hynvann dhe dhons : ty re dhiwiskas ow yskar ha'm grogysa gans lowender.

¹² Rakhenna ow enev a gan gormola ha ny dew : A Arloedh ow Duw, my a'th wormel bys vykken.