Salmow 28 - An Sowter 1997 2023

SALM 28. Ad te, Domine.

¹ Warnas jy y halwav, A Arloedh; ow harrek : na vydh bodhar orthiv vy, ma na viv, mar tewydh, kepar ha'n re a dhiyskynn dhe'n pytt.

² Klew lev ow govynnadow, pan griav dhis rag gweres : pan dhrehavav ow diwleuv troha'th tempel sans.

³ Na'm kemmer vy dhe-ves gans an debeles na gans an dhrogoberoryon : neb a lever kres gans aga hynsa, ha dregynn yn aga holonn.

⁴ Ro dhedha i herwydh aga ober : ha herwydh sherewneth aga gwriansow.

⁵ Ro dhedha i herwydh ober aga diwleuv : attal dhedha aga gober gwiw.

⁶ Rag ny wrons vri a wriansow an Arloedh, na ober y dhiw­leuv : ev a's tewl dhe'n dor, ha ny's drehav.

⁷ Benniges re bo an Arloedh : rag ev re glewas lev ow govynnadow.

⁸ An Arloedh yw ow nerth ha'm skoes; ow holonn re drestyas ynno ev, ha gweresys ov vy : ytho ow holonn a lowenha yn feur, ha gans ow han my a'n gormel.

⁹ An Arloedh yw nerth y bobel : hag ev yw skovva selwyans y Untys.

¹⁰ Salw dha bobel, ha bennik dha ertach : bydh aga bugel, ha'ga drehevel bynitha.