Salmow 27 - An Sowter 1997 2023

SALM 27. Dominus illuminatio.

¹ An Arloedh yw ow golow ha'm selwyans; piw anodho y porthav own : an Arloedh yw kastell ow bewnans; piw anodho y fydhav ownek?

² Pan dheuth an dhrogoberoryon y'm ogas dhe dhybri ow hig : ow eskerens ha'm envi, i a drebuchyas ha koedha.

³ Kyn hwrello lu kampya er ow fynn, ny berth ow holonn own : kyn sortyo bresel er ow fynn, hwath my a vydh fydhyansek.

⁴ Unn dra a wovynnis orth an Arloedh, henna a hwilav : my dhe driga yn chi an Arloedh dres oll dydhyow ow bewnans, dhe vires orth tekter an Arloedh, ha dhe brederi yn y dempel.

⁵ Rag ev a'm kel yn y skovva yn dydh anken : yn goskes y dylda ev a'm kudh, ev a'm gorra war-vann war garrek.

⁶ Ha lemmyn, ow fenn a vydh ughelhes : a-ugh ow eskerens a-derdro.

⁷ Ha my a offrynn sakrifisow a lowena yn y skovva : my a gan, ha kana gormola dhe'n Arloedh.

⁸ Goslow, A Arloedh, pan armav gans ow lev : bydh grassyes orthiv, ha gorthyp dhymm.

⁹ Ow holonn re leveris ahanas, ‘Hwila y fas’ : dha fas, A Arloedh, a hwilav vy.

¹⁰ Na gudh dha fas ragov : na dowl dha was dhe-ves yn sorr.

¹¹ Ty re beu ow gweres : na wra ow gasa na forsakya, A Dhuw ow selwyans.

¹² Pan y'm forsak vy ow thas ha'm mamm : an Arloedh a'm degemmer.

¹³ Dysk dhymm dha fordh, A Arloedh : ha hembronk vy yn hyns kompes, drefenn ow eskerens.

¹⁴ Na'm ro vy dhe vynnas ow eskerens : rag fals dhustuniow re sevis er ow fynn, ha'n re a gews yn hager.

¹⁵ Hemma a grysav, my dhe weles dader an Arloedh : yn tir an re vew.

¹⁶ Gwra fydhya y'n Arloedh : bydh nerthek ha bedhes dha golonn konfortys; ha gorta an Arloedh.