Salmow 26 - An Sowter 1997 2023

SALM 26. Judica me, Domine.

¹ Breus vy, A Arloedh, rag my re gerdhas yn tivlam : ha my re drestyas y'n Arloedh heb trebuchya.

² Hwither vy, A Arloedh, ha prov vy : assay ow lonethi ha'm kolonn.

³ Rag yma dha dregeredh a-dherag ow dewlagas : ha my re gerdhas y'th wirder.

⁴ Ny esedhis vy gans koegyon : ha ny gowethyav gans tus fekyl.

⁵ My re gasas kuntelles an dhrogoberoryon : ha ny esedhav gans an debeles.

⁶ My a wolgh ow diwleuv yn gwiryonsys : ha mos a-dro dhe'th alter, A Arloedh,

⁷ Ow kana kan a rasyans : hag ow terivas dha varthusyon oll.

⁸ Arloedh, my re garas trigva dha ji : an tyller mayth annedh dha wolewder.

⁹ Na guntell ow enev gans peghadoryon : na'm bewnans gans tus woesek;

¹⁰ Yma dregynn yn aga diwleuv : ha'ga leuv dhyghow yw leun a falswobrow.

¹¹ Ha my, my a gerdh heb namm : daspren vy, ha bydh grassyes orthiv.

¹² Ow throes a sev yn tyller kompes : y'n kuntellesow my a'th vennik, A Arloedh.