Salmow 25 - An Sowter 1997 2023

SALM 25. Ad te, Domine, levavi.

¹ Dhiso jy, A Arloedh, y trehavav ow enev; Ow Duw, my a drest ynnos jy : na as vy dhe berthi meth, na vedhes ow eskerens heudhik a'm govis.

² Sur na berthes meth an re a drest ynnos jy : perthes meth an re a wra falsuri heb ken.

³ Diskwa dhymm dha fordhow, A Arloedh : dysk dhymm dha hynsyow.

⁴ Hembronk vy y'th wirder, ha dysk dhymmo vy : rag ty yw Duw ow selwyans; ynnos jy y trestyav oll an jydh.

⁵ Porth kov, A Arloedh, a'th truedh ha'th tregeredh : rag i re beu yn few trank heb worfenn.

⁶ Na borth kov a beghosow ow yowynkneth, na'm kammweyth : herwydh dha dregeredh porth kov ahanav, A Arloedh, a-barth dha dhader.

⁷ Da hag ewn yw an Arloedh : rakhenna ev a dhysk dhe beghadoryon y'n fordh.

⁸ Ev a hembronk an re uvel yn gwirvreus : hag ev a dhysk y fordh dhe'n voghosogyon.

⁹ Oll hynsyow an Arloedh yw tregeredh ha gwirder : dhe'n re a with y gevambos ha'y dhustuniow.

¹⁰ A-barth dha Hanow, A Arloedh : gav dhymm ow hannweyth, rag meur yw.

¹¹ Py den yw ev neb a berth own a'n Arloedh : ev a dhysk dhodho y'n fordh a dhewis ev.

¹² Y enev a drig yn sewenyans : ha'y has a erit an tir.

¹³ Yma kevrin an Arloedh gans an re a berth own anodho : hag ev a dhiskwa dhedha y gevambos.

¹⁴ Prest yma ow dewlagas war an Arloedh : hag ev a dhre ow threys yn-mes a'n roes.

¹⁵ Treyl dhymmo vy, ha bydh grassyes orthiv : rag digoweth ha boghosek ov vy.

¹⁶ Ankenyow ow holonn yw meur aga niver : tenn vy yn-mes a'm ankres.

¹⁷ Mir orth ow anken ha'm poenvos : ha gav oll ow feghosow.

¹⁸ Mir orth ow eskerens, rag meur yw aga niver : ha gans kas fell i a'm kas.

¹⁹ Gwith ow enev ha gwra ow delivra : na as vy dhe berthi meth, rag my a hwila skovva ynnos jy.

²⁰ Re'm gwittho perfydhder ha gwiryonsys : rag my a hwila skovva ynnos jy.

²¹ Daspren Ysrael, A Dhuw : yn-mes a'y ankenyow oll.