Salmow 21 - An Sowter 1997 2023

SALM 21. Domine, in virtute tua.

¹ An Myghtern a lowenha y'th nerth, A Arloedh : hag y'th selwyans, ass vydh ev heudhik.

² Ty re ros dhodho hwans y golonn : ha ny neghsys dhodho govynnadow y dhiwweus.

³ Rag ty a a-dheragdho gans bennathow dader : ty a worr kurun a owr fin war y benn.

⁴ Ev a wovynnas bewnans orthis, ha ty a'n ros dhodho : dydhyow hir bys vykken ha bynnari.

⁵ Meur yw y wolewder ev y'th selwyans : ty a worr splannder ha meuredh warnodho.

⁶ Rag ty a ros dhodho bennathow bys vykken : ty a'n gwra heudhik gans lowena a-wel dhe'th fas.

⁷ Rag an Myghtern a drest y'n Arloedh : ha dre dregeredh an Ughella ny wra ev trebuchya.

⁸ Dha leuv a gemmer oll dha eskerens : dha leuv dhyghow a gemmer an re a'th kas.

⁹ Ty a's gwra kepar ha fornes a dan yn prys dha sorr : an Arloedh a's kollenk yn y goler, ha'n tan a's deber.

¹⁰ Ty a dhistru aga frut dhiworth an nor : ha'ga has dhiworth mebyon den.

¹¹ Rag i a vynnas drog er dha bynn : i a dewlis dregynn, mes ny allsons y wul.

¹² Rakhenna ty a wra dhedha treylya aga heyn : ty a dharbar kerdyn dha waregow erbynn aga fasow.

¹³ Bydh ughelhes, A Arloedh, y'th nerth : ni a gan hag a wormel dha alloes.