Salmow 2 - An Sowter 1997 2023

SALM 2. Quare fremuerunt gentes?

¹ Prag y hwra an kenedhlow deray : ha'n poblow devisya taklow euver?

² Myghternedh an norvys a sev, ha'n rewloryon a omgusul war-barth : erbynn an Arloedh hag erbynn y Untys.

³ ‘Terryn ni aga rawyow dhe demmyn : ha tewlel aga herdyn dhiworthyn.’

⁴ Neb a esedh y'n nevow a hwerth : an Arloedh a wra ges anedha.

⁵ Ena ev a gews orta yn y sorr : ha'ga broweghi yn y gonnar.

⁶ ‘My re worras ow Myghtern : war Sion ow menydh sans.’

⁷ My a dheriv ordenans an Arloedh : ev a leveris dhymm, ‘Ty yw ow Mab, hedhyw my re'th tineythis.

⁸ Govynn orthiv, ha my a re dhis an kenedhlow y'th ertach : ha pennow pella an nor y'th perghennogeth.

⁹ Ty a's terr gans gwelenn horn : ty a's brew dhe demmyn avel lester gweythor pri.’

¹⁰ Ytho bedhewgh fur lemmyn, hwi vyghternedh : gwrewgh vri a'n gwarnyans ma, hwi vreusysi an norvys.

¹¹ Servyewgh an Arloedh gans own : ha lowenhewgh gans krena.

¹² Ymmewgh dhe'n Mab, ma na vo serrys ha na yllowgh dhe goll y'n fordh : rag y sorr a flamm yn skon; gwynnvys an re a hwila skovva ynno ev.