Salmow 18 - An Sowter 1997 2023

SALM 18. Diligam te, Domine.

¹ My a'th kar, A Arloedh, ow nerth; an Arloedh yw ow harrek, ha'm kastell, ha'm delivrer : ow Duw, ow harrek krev may hwilav skovva ynno, ow skoes, ha korn ow selwyans, ow dinas.

² My a elow war an Arloedh, neb yw gwiw dhe vos gordhys : ytho my a vydh selwys a'm eskerens.

³ Yth esa kerdyn ankow a-dro dhymm : ha frosow sherewynsi a wrug euth dhymm.

⁴ Yth esa kerdyn ifarn a-dro dhymm : yth esa antylli mernans a-dheragov.

⁵ Y'm anken my a elwis war an Arloedh : ha dhe'm Duw y kriis vy rag gweres.

⁶ Ev a glewas ow lev yn-mes a'n tempel : ha'm kri a-dheragdho a dheuth bys yn y dhiwskovarn.

⁷ Ena an nor a grenas ha kryghylli : ha selyow an menydhyow a grysyas ha krena, rag y vos serrys.

⁸ Mog a yskynnas mes a'y dhewfrik : ha tan a'y anow, ow tevorya; kolennow a dardhas yn flammow a-dhiworto.

⁹ Hag ev a blegyas an nevow, hag a dheuth yn-nans : hag yth esa tewolgow yn-dann y dreys.

¹⁰ Hag ev a varghogas war jerub ha nija : ev a nijas uskis war eskelli an gwyns.

¹¹ Ev a wrug tewlder y gudhans, y babell a-dro dhodho : kommol tewl a dhowr y'n ebron.

¹² Dhiworth an golewder a-ragdho y gommol a dremenas: keser ha kolennow tan.

¹³ An Arloedh ynwedh a darenas y'n nevow, ha'n Ughella a ros y lev : keser ha kolennow tan.

¹⁴ Ev a dhellos y sethow ha skattra y eskerrens : lughesennow pals, ha'ga gorra yn deray.

¹⁵ Ena yth omdhiskwedhas goverow dowr, ha selyow an norvys a veu diskudhys, orth dha geredh, A Arloedh : orth hwyth anall dha dhewfrik.

¹⁶ Ev a dhannvonas dhiworth an ughelder ha'm kemmeres : ev a'm tennas mes a dowrow pals.

¹⁷ Ev a'm delivras dhiworth ow eskar galloesek, ha dhiworth an re a'm kas : rag yth ens i re grev ragov.

¹⁸ I a dheuth er ow fynn yn dydh ow therroesa : mes an Arloedh re beu skoedhyans dhymm.

¹⁹ Ev a'm dros yn-mes dhe dyller ledan : ev a'm delivras, drefenn bos dhodho delit ynnov.

²⁰ An Arloedh re wrug dhymm herwydh ow ewnder : herwydh glander ow diwleuv yth attylis ev dhymm.

²¹ Rag my re synsis fordhow an Arloedh : ha ny dhiberthis yn trog dhiworth ow Duw.

²² Rag yth esa oll y vreusow ev a-dheragov : ha ny dreylis vy y ordenansow dhiworthiv.

²³ Hag yth en vy divlam a-dheragdho : ha my a omwithas dhiworth ow hammweyth.

²⁴ Rakhenna an Arloedh re attylis dhymm herwydh ow ewnder : herwydh glander ow diwleuv yn y wolok ev.

²⁵ Gans an den tregeredhus ty a vydh tregeredhus : gans an gour divlam ty a vydh divlam.

²⁶ Gans an den glan ty a vydh glan : ha gans an den kamm ty a vydh gorth.

²⁷ Rag ty a selow an bobel uvel : mes ty a dhre dhe'n dor an dhewlagas woethus.

²⁸ Rag ty a enow ow lugarn : an Arloedh ow Duw a wra dhe'm tewlder splanna.

²⁹ Rag dredhos my a yll poenya erbynn lu : ha der ow Duw my a yll lemmel dres fos.

³⁰ Duw yw divlam y fordh : lavar an Arloedh yw prevys; skoes yw dhe seul a drest ynno.

³¹ Rag piw yw Duw marnas an Arloedh : ha piw yw karrek marnas agan Duw ni?

³² An Duw neb a worr grogys a nerth a-dro dhymm : hag a wra ow fordh divlam.

³³ Ev a wra ow threys kepar ha treys ewigow : ha'm settya fyrv war dylleryow ughel.

³⁴ Ev a dhysk dhe'm diwleuv gwerrya : ha'm dywvregh a yll plegya gwarak a vrons.

³⁵ Ha ty re ros dhymm skoes dha selwyans : dha leuv dhyghow a'm menten, ha'th weres re'm meurhas.

³⁶ Ty a ros spas ledan rag ow hammow yn-dannov : ma na drebuchyas ow dewufern.

³⁷ My a helgh ow eskerens ha'ga hachya : ha ny dhehwelav bys pan vons distruys.

³⁸ My a's brew ma na allons sevel : i a goedh yn-dann ow threys.

³⁹ Rag ty re worras grogys a nerth a-dro dhymm rag an gas : ty re worras yn-dannov an re a sevis er ow fynn.

⁴⁰ Ty a ros dhymm gwarrow ow eskerens : may hallen vy distrui an re a'm kas.

⁴¹ I a grias, mes nyns esa nagonan dh'aga selwel : war an Arloedh, mes ny worthybis dhedha.

⁴² My a's brew munys avel doust a-dherag an gwyns : my a's trett yn-dann dreys avel leys an stretys.

⁴³ Ty re'm delivras dhiworth strifow an bobel, ha'm gorra yn penn an kenedhlow : pobel na aswonnis vy a wra ow servya.

⁴⁴ Kettell glewons ahanav, gostydh yns i dhymm : estrenyon a ombleg dhymm.

⁴⁵ Estrenyon a gemmer digolonn : i a dheu ow krena yn-mes a'ga heryow.

⁴⁶ An Arloedh a vew, ha benniges re bo ow harrek : ha bedhes Duw ow selwyans ughelhes,

⁴⁷ An Duw neb a re dhymm dial : hag a worr poblow yn-dannov,

⁴⁸ Neb a'm delirv dhiworth ow eskerens, ha'm drehevel a-ugh an re a sev er ow fynn : ty a'm delirv dhiworth an gour garow.

⁴⁹ Rakhenna my a'th wormel, A Arloedh, yn mysk an kenedhlow : ha kana gormola dhe'th Hanow.

⁵⁰ Ev a re selwyans meur dh'y Vyghtern : hag a wra tregeredh dh'y Untys, dhe Davydh ha dh'y has bys vykken.