Salmow 16 - An Sowter 1997 2023

SALM 16. Conserva me, Domine.

¹ Gwith vy, A Dhuw : rag ynnos jy y hwilav skovva.

² My re leveris dhe'n Arloedh : ‘Ty yw ow Arloedh, nyns eus genev travyth da a-der ty.’

³ A-barth an syns usi y'n bro : ha'n re vryntin, yma oll ow lowena ynna i.

⁴ Aga galarow a voghha : seul a fysk war-lergh duw arall.

⁵ Ny offrynnav goes aga offrynnow-diwes : ha ny gemmerav aga henwyn y'm diwweus.

⁶ An Arloedh yw ow rann dhewisys ha'm hanaf : ty a syns ow hevrenn.

⁷ An rann re goedhas ragov yn tylleryow teg : devri yma dhymm ertach splann.

⁸ My a vennik an Arloedh, neb a ros dhymm kusul : devri ow lonethi a'm kesk yn termyn nos.

⁹ My re worras an Arloedh prest a-dheragov : drefenn y vos ev a'm leuv dhyghow, ny drebuchyav vy.

¹⁰ Rakhenna heudhik yw ow holonn, ha'm enev a lowenha : ha'm kig ynwedh a drig yn sawder.

¹¹ Rag ny vynnydh gasa ow enev yn ifarn : na ri dha Sans dhe weles an pytt.

¹² Ty a dhiskwa dhymm an fordh a vewnans; y'th wolok jy yma lanwes lowena : y'th leuv dhyghow yma joy nevra a bes.