Salmow 147 - An Sowter 1997 2023

SALM 147. Laudate Dominum.

¹ Gormelewgh an Arloedh, rag da yw kana gormola dh'agan Duw ni : plegadow ha gwiw yw y wormel.

² An Arloedh a dhrehav Yerusalem : ev a guntell war-barth divresow Ysrael.

³ Ev a yaghha an re trogh aga holonn : ha kelmi aga goliow.

⁴ Ev a amont niver an ster : ev a re henwyn dhe bubonan anedha.

⁵ Meur yw agan Arloedh, ha meur yw y nerth : heb fin yw y gonvedhes.

⁶ An Arloedh a skoedh an re hwar : hag a iselha an debeles dhe'n leur.

⁷ Kenewgh dhe'n Arloedh gans grasyans : kenewgh gormola war an sowtri dh'agan Duw;

⁸ Neb a gudh an nevow gans kommol, ha darbari glaw rag an nor : ha gul dhe wels tevi war an menydhyow.

⁹ Ev a re dhe'n gwarthek aga boes : ha dhe ydhnigow an varghvran pan elwons.

¹⁰ Nyns eus ganso delit yn nerth an margh : ha ny gemmer ev plesour yn diwarr gour.

¹¹ Mes an Arloedh a gemmer plesour y'n re a'n own : y'n re a fydh yn y dregeredh.

¹² Gormel an Arloedh, A Yerusalem : gormel dha Dhuw, A Sion.

¹³ Rag ev re grevhas barrys dha borthow : ev re vennigas dha fleghes a-berth ynnos.

¹⁴ Ev a wra kres y'th oryon : ha'th lenwel a waneth a'n gwella.

¹⁵ Ev a dhyllo y worhemmynn war an nor : resek a wra y lavar pur uskis.

¹⁶ Ev a re ergh avel gwlan : ev a les loesrew avel lusow.

¹⁷ Ev a skoell yey avel brewyon : piw a yll sevel a-rag y yeynder?

¹⁸ Ev a dhyllo y lavar ha'ga theudhi : ev a wra dh'y wyns hwytha, ha'n dowrow a dhewrak.

¹⁹ Ev a dhiskwa y er dhe Yakob : y ordenansow ha'y vreusow dhe Ysrael.

²⁰ Ny dhyghtyas kenedhel nahen yndellma : ha'y vreusow, ny's aswonnons.