Salmow 143 - An Sowter 1997 2023

SALM 143. Domine, exaudi.

¹ Klew ow fysadow, A Arloedh, ro skovarn dhe'm govynnadow : gorthyp dhymm a-barth dha lelder ha'th wirder.

² Na dhoro dha was dhe vreus : rag y'th wolok jy ny vydh denvyth bew prevys gwiryon.

³ Rag an eskar re helghyas ow enev; ev re skwattyas ow bewnans dhe'n leur : ev re wrug dhymm triga yn tewlder, kepar ha'n re yw marow seuladhydh.

⁴ Rakhenna ow spyrys a glamderas ynnov : ha'm kolonn a-bervedh ynnov a goedhas yn desper.

⁵ My a berth kov a'n dydhyow koth; my a breder a'th wriansow oll : my a breder a oberow dha dhiwleuv.

⁶ My a ystynn ow diwleuv dhiso : ow enev a yeun war dha lergh kepar ha tiredh sygh.

⁷ Fisten dhe worthybi dhymm, A Arloedh, rag ow spyrys a fyll : na gudh dha fas ragov, ma na viv kepar ha'n re a dhiyskynn dhe'n pytt.

⁸ Gwra dhymm klewes dha dregeredh myttinweyth, rag ynnos jy y trestyav : gwra dhymm godhvos an fordh y koedh dhymm kerdhes ynni, rag dhiso jy y trehavav ow enev.

⁹ Gwra ow delivra, A Arloedh, dhiworth ow eskerens : dhiso jy y fiav rag skovva.

¹⁰ Dysk dhymm gul dha vodh, rag ty yw ow Duw : gwres dha Spyrys kuv ow hembronk yn tir kompes.

¹¹ Bewha vy, A Arloedh, a-barth dha Hanow : a-barth dha ewnder doroy ow enev yn-mes a anken.

¹² Y'th tregeredh diswra ow eskerens : ha distru oll an re a omladh erbynn ow enev; rag dha was ov vy.