Salmow 141 - An Sowter 1997 2023

SALM 141. Domine, clamavi.

¹ Arloedh, my a elow warnas, fisten dhymm : klew ow lev pan alwav warnas.

² Re bo ow fysadow a-dheragos avel ynkys : ha'm diwleuv drehevys avel offrynn gwesper.

³ Gorr gwithyas, A Arloedh, a-rag ow ganow : gwith daras ow diwweus.

⁴ Na bleg ow holonn dhe dravyth dhrog : dhe wul drogoberow gans gwer a wra sherewneth; na as vy dhe dastya aga boesow sawrek.

⁵ Gwres den gwiryon ow gweskel : gwres den len ow rebukya.

⁶ Na as dhe oyl an tebelwas untya ow fenn : rag ow fysadow a vydh prest erbynn aga drogoberow.

⁷ Aga breusysi a vydh tewlys dhe'n dor ryb an garrek : hag i a glew ow lavarow, rag kemmeradow yns.

⁸ Kepar ha den owth aras hag ow kloesya war an tir : yn kettella y fydh aga eskern skattrys orth ganow ifarn.

⁹ Mes ow dewlagas a vir orthis, A Arloedh Duw : ynnos jy y hwilav skovva, na as vy dhe vos heb ammok.

¹⁰ Gwith vy rag an vaglenn re worrsons er ow fynn : ha rag antylli an dhrogoberoryon.

¹¹ Koedhes an debeles yn aga roesow aga honan : ha my ow tremena yn saw.