Salmow 139 - An Sowter 1997 2023

SALM 139. Domine, probasti.

¹ A Arloedh, ty re'm hwithras ha'm aswonn : ty a aswonn ow esedha ha'm sevel, ty a gonvedh ow frederow a bellder.

² Ty a hwither ow hyns ha'm growedha : ha ty a aswonn oll ow fordhow.

³ Rag nyns eus ger war ow thaves : heb ty, A Arloedh, dh'y wodhvos yn tien.

⁴ Ty re'm degeas a-dryv hag a-rag : ha gorra dha leuv warnav.

⁵ Re varthys ragov yw an skians na : re ughel yw, ny wonn drehedhes dhodho.

⁶ Ple'th av dhiworth dha Spyrys : ha ple fiav dhiworth dha fas?

⁷ Mars av vy yn-bann dhe nev yth esos ena : mar tarbarav ow gweli yn ifarn ottajy ena ynwedh.

⁸ Mar kemmerav eskelli an jydh-tardh : ha triga yn penn pella an mor;

⁹ Ena ynwedh dha leuv a'm hembronk : ha'th leuv dhyghow a'm syns.

¹⁰ Mar lavarav, ‘Yn hwir, tewolgow a'm kudh : ha golow a vydh nos a-dro dhymm’,

¹¹ Hwath nyns yw tewolgow tewl genes jy, mes an nos a splann avel an jydh : kehaval yw an tewolgow ha'n golow genes jy.

¹² Rag ty a formyas ow lonethi : ty a'm gwias war-barth yn brys ow mamm.

¹³ My a'th wormel, rag euthyk ha marthys osta : marthys yw dha oberow; ha'm enev a woer hemma yn ta.

¹⁴ Nyns o ow eskern kudhys ragos : pan en vy formys yn-dann gel, gwiys yn konnyk yn rannow isella an nor.

¹⁵ Dha dhewlagas a welas ow devnydh kyns ow bos genys : hag y'th lyver jy oll ow eseli yw skrifys;

¹⁶ Oll ow dydhyow a veu niverys : kyns onan anedha dhe dhos yn bosva.

¹⁷ Ass yw drudh dhymm dha brederow, A Dhuw : ass yw meur aga sommenn!

¹⁸ Mara's niverren, y fiens moy es an tewes : mar teffen dh'aga gorfenn, y fia ow blydhynyow kehaval dhe'th vlydhynyow jy.

¹⁹ Unnweyth mar kwrelles ladha an tebelwas, A Dhuw : omdennewgh dhiworthiv ytho, hwi dus woesek.

²⁰ I a gews er dha bynn gans droktowlow : hag i a dhrehav euveredh er dha bynn.

²¹ A ny's kasav, A Arloedh, neb a'th kas jy : a ny'm beus keudh drefenn an re a sev er dha bynn?

²² My a's kas gans kas kowal : my a's syns yn eskerens.

²³ Hwither vy, A Dhuw, ha godhvydh ow holonn : prov vy, ha godhvydh ow frederow;

²⁴ Ha gwel mar eus fordh a sherewneth ynnov : ha hembronk vy y'n fordh nevra a bes.