Salmow 132 - An Sowter 1997 2023

SALM 132. Memento, Domine.

¹ Porth kov, A Arloedh, a Davydh : ha'y boenvos oll;

² Fatell dos ev ti dhe'n Arloedh : ha lia li dhe Dhuw galloesek Yakob;

³ ‘Nyns av a-berth yn skovva ow chi : na yskynna yn tyller ow gweli;

⁴ Ny rov kosk dhe'm dewlagas : na hun dhe greghyn ow dewlagas;

⁵ Erna gyffiv tyller dhe'n Arloedh : trigva dhe Dhuw galloesek Yakob.’

⁶ Otta, ni a glewas anedhi yn Efratha : ha'y havoes yn gwelyow an koes.

⁷ ‘Gwren ni mos a-berth yn y drigvaow ev : hag omblegya a-dherag y skavell-droes.’

⁸ Sav, A Arloedh, a-berth y'th powesva : ty hag argh dha nerth.

⁹ Bedhes dha oferysi gwiskys yn ewnder : ha gwres dha syns garma yn lowen.

¹⁰ A-barth Davydh dha was : na dreyl dhe-ves fas dha Untys.

¹¹ An Arloedh re dos ti yn gwiryonedh dhe Davydh : ny wra ev treylya dhiworto;

¹² ‘Onan a'n frut a'th korf : a worrav war dha se.

¹³ Mar kwra dha fleghes synsi ow hevambos ha'm dustuniow a dhyskav dhedha : aga fleghes ynwedh bynitha a vydh esedhys war dha dron.’

¹⁴ Rag an Arloedh re dhewisas Sion : ev re yeunis war hy lergh dhe vos trigva dhodho.

¹⁵ ‘Hemma a vydh ow fowesva bynitha : omma y trigav, rag my re yeunis war hy lergh.

¹⁶ Hy boes yn tevri a vennigav : dh'y boghosogyon y rov bara lowr.

¹⁷ Hy oferysi a wiskav gans selwyans : ha'y syns a arm gans lowena.

¹⁸ Ena y hwrav dhe gorn Davydh egina : my re dhyghtyas lugarn dhe'm Untys.

¹⁹ Y eskerens my a wiskav gans meth : mes warnodho y fydh y gurun ow splanna.’